TAGBILARAN CITY, Bohol, Feb. 08 (PIA)–BISAN gisaulog ang iyang ika-53 nga adlaw’ng natawhan karong adlawa, padayon gihapon sa pagtrabaho si Presidnete Benigno “Noynoy” Aquino III.
Ganinang buntag, gi-bisita sa Presidente ang duha ka cancer patients sa Philippine Orthopedic Hospital.
Sa wala pa nag-alas 10:00 ganinang buntag, gi-duaw sa Presidente ang maong tambalanan ug gitubag ang pangandoy sa usa ka binatilyong pasyenteng si Jericho Navarro Rafols, 15-anyos ug cancer of the bone patient sukad pa sa edad nga 13. Ang usa usab ka pasyente mao ang bone cancer osteosarcoma patient nga si Maniego Mario, 47-ayos.
Matud pa ni Deputy Presidential Spokesperson Abigail Valte, mitambong usab sa usa ka panagpulong ang Presidente ganinang alas 10 sa buntag ug gipangunahan niya ang full cabinet meeting ganinang 1:30 p.m.
“Yes, the president has work today. Ever since 2010, it has always been work over play during his birthday,” pamahayag pa ni Valte sa usa ka pakig-hinabi sa telebisyon ganinang buntag.
Karong gabii, giingong adunay private dinner si Presidente Aquino sa iyang pamilya. (PIA-Bohol/ecb/i-gg)
Brillantes, masaligon nga dili na kinahanglan pang mobalik sa mano-manong eleksyon
TAGBILARAN CITY, Bohol, Feb. 08 (PIA)–GIPAHAYAG ni Commission on Elections (Comelec) chairman Sixto Brillantes Jr. nga katapusang paagi na lamang ang pagbalik sa mano-mano nga sistema sa piniliay kun dili gayud madala ang automated election sa umaabot nga buwan sa Mayo.
Bisan giingong andam ang Comelec sa maong sitwasyon, nipahayag pa gihapon og pagsalig ang opisyal nga madayon gayud ang automated elections.
Matud pa ni Brillantes, dili basta-basta mahimong ibalik sa mano-mano ang eleksyon tungod kay gitakda sa Republic Act 9369 nga angay ipahigayon ang eleksyon pinaagi sa automation.
Nakalatid sa Section 1 sa Poll Automation Law nga: “It is policy of the State to ensure free, orderly, honest, peaceful, credible and informed elections… by improving on the election process and adopting systems, which shall involved the use of an automated election system.”
Taliwala sa mga giingong aberya, giseguro sa Comelec nga masulbad ra nila ang mga problema sa dili pa ang eleksyon sa Mayo 13. (PIA-Bohol/ecb/i-gg)