MANILA, Dec. 26 (PIA)–Gipahibalo karon sa gobyerno nga mohatag kini og unom ka buwan nga gun amnesty aron sa pag-aghat sa mga nanag-iya og pusil sa tibuok nasud nga ipa-rehistro ang ilang mga pusil.
Base kini sa pagsunod sa gipahugtang balaod sa pagpanag-iya og pusil ubos sa Republic Act 10591 o ang bag-ong Gun Control Law sa nasud.
Ubos niining balaod, may unom ka buwang amnestiya alang sa mga nanag-iya og pusil nga napakyas o wala magpa-lisensya sa pusil, sa panahong ipatuman ang implementing rules and regulations (IRR) niini.
Gipahinumdoman sa Philippine National Police (PNP) ang mga sibilyan sa bug-at nga silot sa mga nanag-iya og ilegal nga pusil diin kun kaniadto 4 hangtud 6 ka tuig lamang nga pagkabilanggo ang silot sa mga masakpang nagkupot og mga low firearms o Class A firearms nga walay dokumento, gisaka na kini karon ngadto sa 10 hangtud 12 ka tuig nga pagkabilanggo og gawas pa sa multa.
Samtang adunay silot nga 6 hangtud 8 ka tuig sa mga gun owner nga masakpang magdala og armas sa gawas sa balay nga wala’y ‘permit to carry firearm outside residence’ nga kaniadto 6 ka buwan hangtud 6 ka tuig nga pagkabilanggo lamang ang silot.
Sa talaan sa PNP, naa sa 600,000 ka pusil ang makonsiderar nga dili lisensyado, samtang 25,000 usab ang giingong naa sa kamot sa mga sindikato ug kriminal. (PIA7-Bohol/ECB)
Mga pasahero sa barko, gipahinumdoman nga bawal magdala og paboto
MANILA, Dec. 26 (PIA)–Subling gipahinumdoman sa Philippine Coast Guard (PCG) ang mga pasahero sa barko nga bawal ang pagdala og mga paboto.
Nanawagan ang PCG sa tanang mo-biyahe o mosakay og barko nga sundon gayud ang mga gipatuman nga gi-dili karong Pasko ug sa nagsingabot nga Bag-ong Tuig.
Matud pa ni Coast Guard Spokesperson Commander Armand Balilo nga gawas sa mga hait nga hinagiban, ilegal nga droga ug mga pusil nga walay papeles, bawal usab ang pagdala og paboto sa mga pasahero sa barko.
Alang sa mga negosyanteng magbiyahe og paboto, kinahanglang may dala silang kumpleto nga dokumento sa kargamento ug ipadala kini sa cargo vessel lamang ug dili mahimong i-uban sa mga passenger vessel.
Samtang giseguro usab sa PCG nga hugot nilang gipatuman ang seguridad alang na usab sa publiko. (PIA7-Bohol/ECB)