TAGBILARAN CITY, Bohol, Feb. 15 (PIA)–NIPASIDAAN ang opisyal sa Philippine Overseas Employment Administration (POEA) sa publiko batok sa mga gitanyag nga trabaho sa Estados Unidos pinaagi sa electronic mail o e-mail.
Matud pa ni POEA Administrator Hans Cacdac, nakadawat sila og impormasyon gikan kang Luzviminda Padilla, Philippine Labor Attaché to Washington D.C., kalabot sa maong pagpangilad.
Giingong nasakpan ang operasyon sa sindikato sa dihang nangayo og tabang sa Philippine Overseas Labor Office (POLO) sa Washington ang usa ka Pinoy didto aron pagberipikar sa gitanyag nga trabaho kaniya nga mahimong yaya nga nadawat niya pinaagi sa e-mail.
Bugti sa trabaho isip yaya sa New Jersey, USA, ang pagpangayo og kantidad alang sa pagproseso sa aplikasyon. Giingong nakapadala na ang Pinoy og US$276.99 pinaagi sa money transfer sa usa ka Qunesha Clewis nga naa sa San Bernardino, California.
Apan human nipahigayon og imbestigasyon ang POLO-Washington, migawas nga dili tinuod ang gihatag nga ngalan ug bisan ang trabahong gitanyag sa e-mail.
Tambag ni Cacdac, ipahibalo dayon sa POEA ug sa hingtungdang ahensiya ang mga gitanyag nga trabaho alang sa gawas na nasud nga ilang madawat pinaagi sa e-mail. (PIA-Bohol/ecb/p-hd)
DFA, nakig-alayon na sa ilang Malaysian counterparts kalabot sa 100 Pinoy sa Sabah
TAGBILARAN CITY, Bohol, Feb. 15 (PIA)–PADAYON nga naka-monitor lang ang Malakanyang sa mga kalamboan kalabot sa pagkasikop sa 100 ka taga-Sulu sa Sabah, Malaysia.
Matud pa ni Deputy Presidential Spokesperson Abigail Valte, nakatutok sa insidente ang Department of Foreign Affairs (DFA) ug nakig-alayon na sila sa ilang Malaysian counterparts.
Si Valte nagkanayon nga isip general rule, otomatikong hatagan og legal assistance ang mga nasikop natong kababayan. Apan giingong dili pa sila makahatag og dugang impormasyon hangtud dili pa maberipika ang kinatibuk-ang detalye sa insidente.
Giingong matud pa ni Defense Sec. Voltaire Gazmin, walay armas ang mga Pilipino nga gikan sa Sultanate of Sulu sukwahi sa giingong iligal nga misulod sa Sabah ang mga armadong lalaki.
Naa sa “wait and see attitude” pa ang DFA kun unsa ang sulod sa report gikan sa embahada sa Malaysia ug sa ilang gipadalang fact finding team sa Sabah.
Miingon karon si DFA spokesman Raul Hernandez nga ang kunsulado sa Pilipinas sa Kuala Lumpur nagpadala na usab og police attache aron makig-alayon sa atong counterpart didto aron matino ang nagpaluyo sa kamatuoran sa maong report. (PIA-Bohol/ecb/i-gg)