Usa sa mga nadakpan maoy suspek sa pag pusil sa usa ka mag-uuma didto sa Buenasuerte, Pilar
Nasulbad sa usa ka sakop sa kapulisan sa siyudad ang hitabong tulis dihang nakig pinusilay kini sa tulo ka armadong suspetsado nga ni resulta sa pagkaigo sa usa niini ug pagkasikop sa laing duha didto ssa dalang J. Borja korner Visarra, dakbayan sa Tagbilaran ngadtong ika-9 niining bulan.
Giila ang nasamdan nga si Edison Roberto, 19-anyos, ulitawo, nagpuyo sa barangay Poblacion, Pilar, Bohol kinsa naigo sa tuong bahin sa paa ug gidala sa Gov. Celestino Gallares Memorial Regional Hospital.
Samtang ang nadakpan nailhan nga sila si Ronni Rezaldo, alias Longlong, 27-anyos, ulitawo ug taga barangay Villa Garcia, Sierra Bullones, Bohol ug Juan Ramirez, 23-anyos taga Poblacion, Pilar, Bohol.
Nasayran sa taho nga samtang si PO2 Cresencio Pantinople sa Tagbilaran City Police Station nagmaneho sa iyang motorsiklo kauban ni Ringo Canete ug padung na untang mopauli mga ala-una sa kabuntagon dihang iyang nasigpatan ang mga suspetsado nga nagsakay sa usa ka itom na Honda XRM nga walay plaka diin ang duha niini nikanaog
ug gitiunan ang biktima nga nailhan nga sila Kay Caesar Penales, 18-anyos,ulitawo ug tinun-an diha sa Holy Name University sa kursong nursing ug taga dalan Penaflor ning siyudad ug si Peter Von Kenneth Tongco, 18,ulitawo, taga Poblacion, Anda, Bohol.
Nipaila si Pantinople nga usa ka polis ug iyang gisita ang mga suspetsado apan usa niini nipusil ngadto kaniya apan wala kini makaigo hinungdan nga nibalus ang maong pulis sa pagpusil ug naigo ang usa niini nga si Roberto. Nakadagan ang duha apan nadakpan sa mga ni responding mga sakop sa City PNP didto sa dalan Palma.
Nabawi gikan sa usa sa mga suspek mao ang .357 rebolber nga pistola nga dunay serial number nga 199803 lakip na ang tulo ka buhing bala ug duha ka basiyong bala. Nakuha usab gikan sa compartment sa motorsiklo sa mga gikatahapan mao ang usa ka Nokia 2600, usa ka Nokia 8310 ug pitaka nga may sulod nga P277 ug mga resibo.
Nahibaw-an sa Bohol Balita nga si Ramirez maoy suspek sa pagpamusil sa iyang bilas nga si Emedio Baretos didto sa Barangay Buenasuerte, Pilar, Bohol niadtong nakalabay nga Miyerkules sa gabii.
Gipaslak na sa detention cell sa City PNP ang duha ka mga suspek samtang gipatambalan pa ang usa sa nasangpit na ospital. (Andy Nalzaro)