TAGBILARAN CITY, Bohol, April 25 (PIA)–Ipadayon sa administration ni Presidente Benigno ‘Noynoy’ Aquino III ug dugangan pa niini ang pondo sa Conditional Cash Transfer Program nga gitawag usab og Pantawid Pamilyang Pilipino Program (4Ps).
Matud pa ni Sen. Franklin Drilon, chairman sa Senate Committee on Finance nga ipadayon ang maong programa tungod kay napamatud-an na kining dakung tabang sa mga kabus ug usa ang CCT Program sa mga Social Economic Programs nga nagpugong sa pagsaka sa gidaghanon sa mga kabus ug gigutom.
Ang 4Ps gisugdan niadtong tuig 2008 nga nagtinguhang matabangan ang mga labing kabus nga mga pamilya sa ilang mga panginahanglan sa kahimsog, nutrisyon ug edukasyon, ilabi na sa mga batang may edad 0-4.
Sa kasamtangang administrasyon, paresan ang programa ug uban pang anti-poverty measures sama sa mas daghang kabus nga ipaubos sa Philhealth coverage, matud pa ni Drilon.
Ubos sa CCT Program, gihatagan og P1,400 matag buwan ang pamilyang kabus bugti sa pagpatungha sa eskwela sa mga bata ug regular nga medical check-up.
Kahinomdoman nga sa labing-ulahing resulta sa survey sa National Statistical Coordination Board (NSCB), giingong wala halos nabag-o ang hut-ong sa kakabus.
Sama sa tubag sa Malakanyang, gipasabot ni Drilon nga midaku usab ang populasyon sa nasud mao nga midaghan ang kabus. (PIA-Bohol/ecb/i-gg)
Website ug mobile app alang sa eleksiyon, gilusad sa Comelec
TAGBILARAN CITY, Bohol, April 25 (PIA)–Napulo’g walo ka adlaw sa dili pa ang 2013 midterm elections, gilusad sa Comelec ang kaugalingon niining website ug mobile application aron tabangan ang mga botate.
Ang “e-Leksyon 2013” website ug mobile application alang sa iOs devices gimugna sa mga web developers gikan sa Smart Communication alang sa Comelec.
Naa sa application ang usa ka simulation kun unsaon pagtubag sa balota.
Didto mohatag og alarma ang application kun sayop ang pag-shade sa oval space sa ngalan sa kandidato.
Nakabutang usab didto ang mga sumbanan sa pagpangampanya apil na usab ang parte diin mahimong mahibaw-an sa usa ka botante ang presinto asa siya angay moadto sa adlaw sa piniliay.
Aron ma-access ang website, mahimong moadto sa http://report.mycomelec.tv samtang ang application usab mahimong ma-download sa iTunes store. (PIA-Bohol/ecb/i-hd)