TAGBILARAN CITY, Bohol, Aug. 01 (PIA)–Gitino na karon sa gobyerno ang giingong mga propesyunal nga wala nagbayad og saktong buwis.
Matud pa ni Presidential Spokesperson Edwin Lacierda, kinahanglang matumbok kun kinsa kini sila aron mapasakaan og tukmang kaso.
Nipagawas og pahayag ang Palasyo tungod sa taho nga giingong mas daku pa ang ginabayad nga buwis sa mga magtutudlo kun itandi sa mga self-employed doctors ug lawyers.
“We are identifying the professionals who are paying less than what they should pay and there will be tax evasion charges filed against them”.
Ang pagbatok sa tax evasion ang usa sa mga nag-unang gitutokan sa administrasyong Aquino.
Mahinungdanon alang sa gobyerno ang taas nga koleksyon sa buwis nga gigamit sa mga mahinungdanong programa partikular na sa pagbatok sa kakabus.
Gikan sa target nga P100 bilyon tax collection niadtong Hunyo, mikabat sa P88.76 bilyon ang nakolektang buwis sa Bureau of Internal Revenue (BIR), apan mas taas kini sa P7.42 bilyon collection o 9.12% niadtong Hunyo sa 2012.
Alang sa 2013, target sa BIR nga makakolekta og P1.2 trilyon o mas taas og 17% sa 2012 tax collection. (PIA-Bohol/ecb)