TAGBILARAN CITY, Bohol, July 04 (PIA)–Sugdan dayon sa Judicial and Bar Council (JBC) ang public interview sa mga pagapiliang chief justice sa Supreme Court (SC) human sa State of the Nation Address (SONA) ni Presidente Benigno “Noynoy” Aquino III.
Matud pa ni Atty. Jose Mejia, miyembro sa JBC, sa Hulyo 24 na nila sugdan ang paggisa sa mga aspirante.
Giingong mahuman nila ang interview sa Hulyo 27.
Sa pagkakaron, 24 ang giingong nasulod sa unang parte sa screening o ang nomination.
Kinahanglang masumite na nila ang short list kang Presidente Aquino sa Hulyo 30 aron makapili na og bag-ong punong mahistrado.
Adunay hangtud Agosto 27 ang punong ehekutibo aron makapili og ihulip ni kanhi Chief Justice Renato Corona.
Kahinumdoman nga gitugotan sa JBC ang live coverage sa public interview apan gitataw nila nga mga JBC member lang ang mahimong mangutana sa mga nominado. (PIA-Bohol/ecb)
Senior citizens lane sa eleksyon, gihangyo sa COMELEC
TAGBILARAN CITY, Bohol, July 04 (PIA)–Gihangyo sa Commission on Elections (Comelec) ang pagbutang og special lane alang sa mga senior citizen sa adlaw sa piniliay.
Nakigpulong na ang Alliance of Senior Citizens Organization sa panguna ni kanhi brodkaster ug kanhi Senador Eddie Ilarde nilang Comelec Chairman Sixto Brillantes ug Commissioner Rene Sarmiento aron ihikyad ang balaodnon nga maghatag og special accomodation sa mga senior citizen sa adlaw sa piniliay.
Sa iyang petisyon, gusto ni Ilarde nga himuong compulsory sa tanang voting center ang pagbutang og entrance, precinct booth ug passage nga exclusive alang sa mga senior citizen aron masiguro nga hapsay ug hamugaway silang makabotar.
Matud usab ni Sarmiento nga napatuman na ang special lane alang sa mga senior citizen ug buntis sa ubang dapit niadtong 2010 elections ug plano kining ipatuman sa midterm elections sa sunod tuig. (PIA-Bohol/ecb)
All-time high record, natala sa lokal nga merkado
TAGBILARAN CITY, Bohol, July 04 (PIA)– Nagsarado sa all-time high record ang trading sa Philippine stocks kagahapon.
Human makaginhawa ang mga investors sa kahadlok tungod sa euro debt crisis, nadasig ang transaksyon sa lokal nga merkado, diin ang main Philippine Stocks Exchange (PSE) index mikita og 65.46 points o 1.23 percent human magsarado sa 5,365.70.
Giingong kini ang labing taas nga rekord ukad niadtong Mayo 3, diin ang record close nitala sa 5,300.41.
Mas daghan usab ang mga gainers o stocks nga mikita nga naa sa 122 kun itandi sa 52 losers.
Gawas sa giingong lig-on nga economic fundamentals sa Pilipinas, nakatabang usab ang pagkalma sa sitwasyon sa Euro zone ug US market.
“We are the strongest market in the region, inspired by improvements in net foreign funds’ inflow,” matud pa ni Freya Natividad, research president sa F. Yap Securities Inc. (PIA-Bohol/ecb)