MANILA, Oct. 14 (PIA)–Gibalik sa Commission on Elections (Comelec) ang ilang online watch batok sa premature campaigners o mga epal alang sa nagsingabot nga Oktubre 28 barangay elections aron ipaabot nga seryoso gayud sila batok sa mga kandidatong sayo nangampanya.
Gi-aghat ni Comelec Spokesperson James Jimenez ang publiko nga magbinantayon ug mag-post o magpaskil og hulagway sa mga posters ug streamers sa mga kandidato nga gibutang sa wala pa magsugod ang campaign period.
“Send pics of premature campaigning using #SumbongKo sa @COMELEC. Make sure to include info on which barangay,” matud pa ni Jimenez sa iyang Twitter account (@jabjimenez).
Ang maong online campaign gawas pa sa mga monitoring teams sa Comelec na naglibot sa nagkalin-laing dapit sa nasud aron mag-dokumento sa mga premature campaigners.
Apil sa mga premature campaigning acts ang pagbutang og posters, streamers ug tarpaulins sa dili pa ang campaign period ug ang pagpahigayon og mga parada ug uban pa human sa pagduso sa ilang Certificates of Candidacy (COCs).
Ang mga mapamatud-ang nalambigit sa premature campaigner mahimong madiskwalipika ug mapasakaan og election offense cases ug mabilanggo og gikan usa hangtud unom ka tuig.
Niadtong Mayo 2013 midterm elections, gigamit sa Comelec ang social media alang sa pagbantay sa campaign strategies sa mga kandidato sa nasudnon ug lokal nga pwesto.
Kasamtangang nagdawat pa karon og COC sa mga gustong mokandidato sa eleksiyon ang Comelec, samtang ang campaign period magsugod karong Biyernes, Oktubre 18 hangtud 26. (ECB/PIA7-Bohol)