TAGBILARAN CITY, Bohol, April 17 (PIA)–Si Vice-President Jejomar Binay ang nag-unang endorser sa mga mokandidatong senador sa 2013 elections.
Sa survey sa Pulse Asia niadtong Pebrero 26 hangtud Marso 9, 2012, migawas nga 73% o 7 sa 10 ka respondents ang nag-ingon nga ibotar nila ang senatorial candidate ang i-endorso ni Binay. 20% usab ang nag-ingon nga dili nila ibotar ang endorsement sa bise-presidente.
Sa susamang survey, migawas usab nga 66% ang nag-ingon nga ibotar nila ang kandidatong suportahan ni Presidente Benigno “Noynoy” Aquino III samtang 25% ang dili mobotar niini.
51% o kapin sa katunga sa mga respondent usab ang ibotar ang suportahang kandidato ni kanhi Presidnete Joseph Estrada; 39% usab ang nag-ingon nga dili mobotar sa kandidato sa kanhi presidente.
Labing gamay nga tsansa ang makuha sa mga suportahan ni kanhi Presidente Gloria Macapagal-Arroyo diin 7% o wala pa’y isa sa matag 10 ka Pinoy ang mobotar sa mga kandidato ni CGMA. Naa sa 82% usab ang miingon nga dili nila ibotar ang mga manok ni Arroyo.
Matud pa sa Pulse Asia, consistent si Binay nga adunay pinakataas nga trust ratings ug pinakataas nga approval rating mao nga siguradong kusog usab sa katawhan ang mga kandidatong i-endorso niini.
Bisan pa niini, wala kini nagpasabot nga ibotar sa katawhan ang bisan kinsa lamang nga suportado ni Binay ug PNoy.
Gitataw sa Pulse Asia nga walay epekto kun dili matunong ang endorser ug kandidato tungod kay mas kahibalo na karon ang mga botante. (PIA-Bohol/ecb)
