TAGBILARAN CITY, November 21 (PIA)–Giisa na usab sa Bureau of Fisheries and Aquatic Resources 7 (BFAR-7) niadtong Sabado ang red tide alert sa kabaybayonan sa lungsod sa Dauis ug syudad sa Tagbilaran.
Si BFAR-7 Regional Director Allan Poquita mipadala sa advisory ngadto sa mga sakop sa media pinaagi sa tigpamaba sa BFAR-Bohol nga si Nimfa Mesina aron mapasidan-an ang publiko kabahin niini.
Matud pa sa maong advisory nga gidili ang pagpanguha ug pagbaligya og mga kinhason nga naggikan sa kabaybayonan sa Dauis ug syudad sa Tagbilaran hangtud wala pa’y abiso gikan sa BFAR-7 tungod sa red tide.
Niadto lamang Marso ning tuig diin ang kinatas-ang red tide alert ning lalawigan gilibkas sa BFAR-7.
Susamang red tide advisory usab ang gipagawas sa maong buhatan nga naglakip gihapon sa kabaybayonan sa Dauis ug syudad sa Tagbilaran nga midagan niadtong Hunyo sa niaging tuig taman Marso ning tuiga.
Apan ang BFAR-Bohol nagpadayon og pasidaan sa mga lokal nga kagamhanan sa Dauis ug syudad sa Tagbilaran nga magpabiling magbinantayon sukad kaniadto ug magpadayon sa pag-monitor sa kabaybayonan aron pagsiguro nga ang pagbalik sa red tide toxins maaksiyonan gayud dayon.
Ning tunga-tunga sa Oktubre, ang BFAR-7 nipasidaan na sa mga konsumideor sa lalawigan sa Bohol sa posibleng pagbalik sa red tide.
Ang red tide mosiaw tungod sa pagdagsa sa talagsaong matang sa algae nga makahilo ug kun adunay kalit nga pag-usab sa panahon gikan sa grabeng kainit ngadto sa pag-ulan. (ecb/PIA7-Bohol)