MANILA, Feb. 4, 2014 (PIA)–Aron makab-ot ang target nga P1.46 trilyon nga tax collection, gilusad kagahapon sa Bureau of Internal Revenue (BIR) ang ilang bag-ong kampanya pinaagi sa music video alang sa saktong pagbayad sa buhis.
Gamit ang bag-ong logo nga “Register, File and Pay” (RFP), tuyo sa ahensya nga makab-ot ang target tax collection pinaagi sa pagpagawas sa maong music video sa telebisyon ug sa online media.
“I Love Philippines, I pay my taxes right, its easy as Register, File and Pay”, ang bag-ong campaign logo sa BIR nga adunay kolor nga red, yellow ug blue nga nag-simbolo sa kolor sa bandila sa Pilipinas.
Matud pa ni BIR Commissioner Kim Henares nga sa paglusad sa 2014 national tax campaign, gilauman nila ang kooperasyon sa publiko ug sa mga regional offices sa ahensya alang sa unified campaign program.
Sa Abril 15 ang deadline sa pagsumiter sa income tax returns.
Kaabag sa BIR ang pipila ka pribadong sektor sa ilang kampanya. Giingong mahinungdanon ang pagbayad sa buhis ilabi na sa pagpalambo sa ekonomiya ug alang sa mga proyektong ipatuman sa gobyerno.
Giseguro ni Henares nga magpadayon ang implementasyon nila sa mga reform projects aron maka-kolekta og dugang buhis.
Gitumbok usab sa BIR ang kamahinungdanon sa public awareness program mao nga sa mga mosunod nga semana, makita na sa telebisyon ug bisan sa online media ang ilang campaign advertisement. (PIA7-Bohol/ECB)