Gi-kompirma ni Presidente Bush sa Estados Unidos ug Presidente Gloria Macapagal-Arroyo nga lig-on gihapon ang relasyon tali sa duha ka nasud ug magtinabangay kabahin sa kasiguruhan sa pagkaon, depensa ug pagpalambo sa ekonomiya.
Mipadayag usab ni Presidente Bush sa iyang pahisubo sa mga nanga-ahol sa trahedya sa MV Princess of the Stars, samtang iyang gibutyag nga padulong na ang ‘aircraft carrier’ USS Ronald Reagan ug ubang sakop sa US Navy sa Pilipinas para sa “massive retrieval and rescue operations.”
Iya usab nga gidayeg si Presidente Arroyo sa iyang “carrot and stick” nga pama-agi sa pagsumpo sa problema sa terorismo sa nasud. Kini base sa “soft and hard” nga pama-agi sa kagamhanan o ang paghatag ug programang ekonomikanhon aron pagbaligk sa sabakan sa balaud, samtang pag-gamit og militar kon dili mamahimo ang nahiunang pama-agi.
Sa iyang tubag, gibutyag ni Presidente Arroyo nga nagpabiling lig-on ang ilang relasyon sa Estados Unidos , ug ilang gihisgutan ang pagtinabangay sa mga programa kabahin sa kasiguruhan sa pagkaon, kalinaw ug pagpalambo sa ekonomiya.
Mapasaligon usab si Presidente Bush nga dili mokawang ang tabang sa Estados Unidos sa Pilipinas kabahin sa problema sa pagkaon. (PIA/Bohol)