TAGBILARAN CITY, Bohol, July 19 (PIA)–Buksan na usab sa Department of Trade & Industry (DTI) Rehiyon 7 ang Sandugo Regional Trade Exposition ning tuig sa The Block sa Island City Mall sa Miyerkoles, Hulyo 24.
Karong anaa na sa ika-8 nga tuig isip regional trade fair, ang Sandugo Trade Expo nakamugna na og kaugalingong ngalan tali sa mga mamamalit ug mga bisita gikan sa nagkalain-laing dapit sa nasud.
Ang exhibit karong tuiga magpasundayag sa mga enterpretasyon sa nga lokal nga mga produkto nga gitutok sa atong kultura, heritage ug sa kalikopan pinaagi sa pagpanalipud niini.
Si Engr. Jerome Gabin sa DTI-Bohol atol sa Kapihan sa PIA niadtong Huwebes mibutyag nga ang mga exhibitors sa maong fair mao ang Small and Medium Enterprises (SMEs) gikan sa Central Visayas apil na sa mga silingang lalawigan sa Kabisay-an ug Mindanao.
Nagdala sa tema nga “Go green. Buy local”, kining maong exhibit modagan gikan Hulyo 24 hangtud 28 nga mag-abli gikan alas 9 sa buntag hangtud sa alas 9 sa gabii.
Usa ka hamubong programa ang mobukas sa exhibit sa alas 4 sa hapon sa Activity Center sa Island City Mall nga pagatambongan ni DTI Undersecretary for Regional Operations Zenaida Cuizon Maglaya.
Ipahigayon usab ang manag-sunod nga paglusad sa SME Roving Academy ug ang MOA signing alang sa Shared Service Facilities (SSF) projects sa DTI isip parte sa opening program.
Isunod dayon ang ribbon cutting ceremony nga pagahimuon didto sa The Block sa ICM.
Si Rey Anthony Regis sa DTI-Bohol mibutyag usab nga parte sa kalihokan sa trade fair ang ipahigayon nga Forum for LGUs on ProGED sa Metro Centre Hotel sa Hulyo 25, SME Roving Academy sa Metro Centre Hotel sa Hulyo 26 ug ang National Competitiveness Council Roadshow sa Bluewater Resort sa Panglao sa Hulyo 26 gihapon. (PIA-Bohol/ecb)