TAGBILARAN CITY, Bohol, Nov. 14 (PIA)–Gipahunong sa Supreme Court (SC) ang kamanduan sa Commission on Elections (Comelec) nga pahamtangan og diskwalipikasyon sa akreditasyon ang upat ka partylist group.
Kini human sa pagpagawas sa SC sa status quo ante order kagahapon batok sa Comelec resolution nga nag-ingong dili na mahimong mosalmot sa 2013 elections ang Ako Bicol (AKB), Association of Philippine Electric Cooperatives (APEC), 1st Consumer’s Alliance for Rural Energy Inc. (1CARE), ug Alliance of Rural Concerns (ARC).
Kalabot niini, gimanduan sa SC ang respondent nga magsumite og komento kalabot sa maong petisyon sulod sa 10 ka adlaw.
Sa iyang petisyon, gitumbok sa mga petisyuner nga mi-abusar sa gahom ang Comelec tungod kay wala sila nahatagi og due process ug basta na lamang gitangtangan og akreditasyon.
Una nang miingon ang Comelec nga ang AKB, APEC, 1CARE ug ARC wala nag-representar sa marginalized sector.
Samtang target sa mga mahistrado sa Korte Suprema nga madesisyunan ang maong isyu sa dili pa ang Pebrero 12 o ang adlaw sa pagsugod sa campaign period. (PIA-Bohol/ecb/i-gg)