TAGBILARAN CITY, Bohol, July 04 (PIA)–Gimando karon ni Presidente Benigno ‘Noynoy’ Aquino III sa Department of Foreign Affairs (DFA) nga ipaseguro ang seguridad sa mga Pinoy nga tua sa Egypt.
Kini human makudeta ang ilang presidente nga si Mohammed Morsi.
Matud pa ni Deputy Presidential Spokesperson Abigail Valte, gitahasan ni Presidente Aquino ang mga hingtungdang embahada aron mahatagan og tabang ang mga OFWs nga posibleng mapiit kun magkagubot didto.
Si Valte nagkanayon nga nakig-alayon na ang atong foreign post sa komunidad sa mga Pilipino didto aron ma-account ang matag usa.
Sa pagkakaron, giingong padayon ang pagdawat sa Presidente sa mga kalambuan gikan sa Egypt ug naka-monitor sa mga panghitabo didto.
Adunay 6,569 ka Pinoy karon sa Egypt nga kasagaran tua sa Cairo ug Alexandria, base sa pinakaulahing talaan sa gobyerno. (PIA-Bohol/ecb)
PDEA, mahimo nang makakuha og search warrant
TAGBILARAN CITY, Bohol, July 04 (PIA)–Gikalipay sa Philippine Drug Enforcement Agency (PDEA) ang pagkalakip karong adlawa sa ilang ahensya sa Korte Suprema sa listahan sa mga ahensyang awtorisadong mangayo og search warrants alang sa paglapas sa Republic Act 9165 o ang Comprehensive Dangerous Drugs Act of 2002.
“We received a letter from Court Administrator of the Supreme Court, informing us that the agency is now officially sanctioned to file applications to conduct lawful searches and seizures within the territorial jurisdiction of the Regional Trial Courts of Manila and Quezon City,” pagbutyag ni PDEA director general Arturo Cacdac Jr.
Apil sa mga ahensyang mahimong makakuha og search warrant mao ang National Bureau of Investigation (NBI), Philippine National Police (PNP) ug ang Anti-Crime Task Force alang sa sa kasong illegal gambling, illegal possession of firearms and ammunition, Intellectual Property Code, Anti-Money Laundering Act of 2001, Tariffs and Customs Code, paglapas sa RA 9165 ug ubang mahinungdanong balaod.
Ang mga executive judge ug vice-executive judge sa regional trial court sa Manila ug Quezon City lamang ang mahimong magpagawas og search warrant. (PIA-Bohol/ecb)