MANILA, Feb. 18 (PIA)–Nisaka sa 9.56% ang turismo sa Pilipinas sa niaging tuig kun itandi sa 2012.
Kalabot niini ang pagsaka usab sa tubo sa buhis sa nasud nga 15.1% o tukma sa P186.15 bilyon. Kini, atubangan sa mga pagsulay nga dala sa niaging mga kalamidad sa nasud.
Matud pa sa Department of Tourism (DOT) nga sa tuig 2013, natala ang 4,681.307 total foreign visitors ug nalabwan pa niini ang 4,272,811 arrivals niadtong 2012.
Natala usab ang highest growth rates sa mga bulan sa Pebrero (15.8%) Hunyo (14%) ug Agosto (13%).
Matud pa ni Tourism Secretary Ramon Jimenez Jr., nahimong hapsay ang performance sa Pilipinas niadtong Disyembre human ang pagpanghasi sa bagyong Yolanda sa Kabisay-an.
Tungod na usab kini sa pag-abot sa mga tabang gikan sa nagkalain-laing nasud ug organisasyon alang sa pagbangon sa Pilipinas gikan sa mga niaging kalamidad.
Sa mga banyagang turista, nagpabiling pinakadaghan ang mga Koreano nga adunay 1.17 milyon arrivals. Gisundan kini sa mga Amerekano nga adunay 674,564; Japan-433,705; China-426,352; ug Australia-213,023.
Matud pa ni Jimenez, daghan pang oportunidad sa turismo ang mahikyad karong tuig gikan sa mga programang ubos sa National Tourism Development Plan sa gobyerno. (PIA7-Bohol/ECB)