TAGBILARAN CITY, Bohol, Oct. 04 (PIA)–Kanselado na ang piniliay alang sa Sangguniang Kabataan sa umaabot Oktubre 28 human gilagdaan ni Presidente Benigno ‘Noynoy’ Aquino III ang gipasakang balaodnon sa Kongreso nga nag-oktaba niinii.
Matud pa ni Deputy Presidential Spokesperson Abigail Valte kaganina sa usa ka press conference, gilagdaan sa Presidente kagahapon ang Republic Act No. 106321 o “An Act to Postpone the Sangguniang Kabataang Elections on October 28, 2013 Amending for the Purpose Republic Act 9340 and for other Purposes.”
Gikatakda untang ipahigayon ang SK election sa Oktubre 28, dungan sa barangay election.
Sa balaod nga gi-aprubahan sa duha ka kapulungan sa Kongreso, dili tugotan ang mga kasamtangang opisyal sa SK nga magpabilin sa ilang puwesto.
Gitugyan usab sa Commission on Elections (Comelec) ang desisyon kun kanus-a himuon pagbalik ang SK election.
Angay makadesisyon ang komisyon gikan Oktubre 2014 hangtud Pebrero 2015.
Gimugna ang SK ubos sa Local Government Code of 1991 aron mahatagan og kahigayonan ang kabataan sa pagdumala. (ECB/PIA7-Bohol)