TAGBILARAN CITY, Bohol, Sept. 18 (PIA)–Desidido ang gobyerno nga alisdan na ang small town lottery (STL) human sa mga impormasyong migawas nga nagamit lamang kini isip front o pangtabon lamang sa iligal nga jeuteng.
Sa usa ka ambush interview sa Lucena City, miingon si Presidente Benigno “Noynoy” Aquino III nga nahuman na ang pag-experiment sa gobyerno sa STL ug gitun-an na sa Philippine Charity Sweepstakes Office (PCSO), buhatan ni Executive Secretary Jojo Ochoa, Department of the Interior and Local Government (DILG) ug Department of Justice (DOJ) ang mga gipatuman nga kontrata.
Gibutyag usab sa Presidente nga daan nang nipahigayon og komprehensibong plano ang nitaliwan nang si DILG Sec. Jesse Robredo aron aksyunan ang problema sa jueteng.
Giingong apil sa mga gisusi sa kalihim ang kalabot sa kita sa mga STL operators ug nangawalang kita sa gobyerno.
Dugang pa sa Presidente, dili lamang ang jueteng nga gitutokan ni Sec. Robredo kaniadto apan apil na ang uban pang matang sa sugal ang pagatutokan karon sa bag-ong DILG Sec. nga si Mar Roxas.
Samtang gitin-aw usab ni PCSO Chairperson Margie Juico nga sa pagkakaron, may gihipno na sila nga implementing rules and regulations (IRR) sa ‘Loterya ng Bayan’ nga maoy ihulip sa STL. (PIA-Bohol/ECB/I-gg)
Galastohan sa mga miyembong adunay grabeng sakit,
abagahon na sa PhilHealth
TAGBILARAN CITY, Bohol, Sept. 18 (PIA)–Abagahon na sa Philippine Health Insurance Corp. (PhilHealth) ang tanang galastohan sa ilang miyembro na may grabeng sakit.
Kini human gilagdaan na ang kasabotan tali sa PhilHealth ug pharmacuetical companies nga maghatag og 30 hangtud 80 porsyentong diskwento sa mga tambal nga nasulod sa Package Z sa PhilHealth.
Apil sa mga sakit nga nahisulod sa maong package ang childhood leukemia, breast cancer stage 0 hangtud III-A, prostate cancer low hangtud intermediate risk, end stage kidney disease nga nanginahanglan og transplant.
Matag package adunay tukmang budget human kini gi-gahinan og igong pondo.
Tungod niini, abagahon na sa PhilHealth ang tanang galastuhan sa pasyente kun sila magpatambal sa mga public hospital nga gikontrata sa Philhealth.
Sa ubang mga pangutana, mahimong motawag sa hotline sa PhilHealth o bisitaha ang labing duol nilang buhatan. (PIA-Bohol/ECB/I-hd)