TAGBILARAN CITY, Bohol, Sept. 16 (PIA)–Gibutyag sa buhatan sa Ombudsman ang plano niining gamiton ang social media aron mabantayan ug iduso ang pagbatok sa korupsyon.
Matud pa ni Ombudsman Conchita Carpio-Morales, gi-aghat sa iyang buhatan ang katawhan nga gamiton ang bag-ong teknolohiya sama sa cellphone aron kuhaan sa akto ang mga badlongong opisyal o kawani sa gobyerno.
Mahimong i-post ang nakuhang video o picture aron mahatagan og impormasyon ang hingtungdang ahensya ug matutukan ang imbestigasyon.
Ning bag-o lang, gipahibalo usab sa maong buhatan nga modawat na sila og online complaints gawas sa regular nga pagdawat og reklamo gikan sa mga sulat ug personal nga pagbisita sa mga petitioners sa ilang opisina.
Tuyo niining mahatagan og kahigayunan ang netizens o internet users nga makatabang sa pagpangita sa mga baglongon nga kawani sa gobyerno.
Alang sa mga netizens o internet users nga adunay ipadangat nga reklamo batok sa mga badlongon nga kawani sa gobyerno, bisitaha lang ang www.ombudsman.gov.ph ug e-click ang online filing sa ibabaw ug tuo nga bahin sa maong homepage. (PIA-Bohol/ecb)
Filing sa COC alang sa brgy. ug SK eleksyon, gi-uswag sa COMELEC
TAGBILARAN CITY, Bohol, Sept. 16 (PIA)–Gi-uswag sa Commission on Elections (Comelec) ang filing sa certificate of candidacy (COC) alang sa mga modagang kandidato sa Barangay ug SK elekyon sa Oktubre.
Matud pa sa tigpamaba sa Comelec nga si Juvenal Beniga, tulo ka adlaw lamang unta ang filing sa COC nga magsugod sa Oktubre 15 hangtud 17, apan adunay bag-ong gipagawas nga Resolution No. 9761 ang Comelec aron i-uswag kini.
Atol sa Information Sharing sa binuwang tigom sa mga miyembro sa Association of United Development Information Officers in Bohol (AUDIO-Bohol) nga gipahigayon sa SB Session Hall sa munisipyo sa Panglao, gibutyag ni Beniga nga gitugotan na ang mga kandidato sa pag-file sa ilang COCs sulod sa 6 ka adlaw sugod Oktubre 11 hangtud Oktubre 17.
Samtang ang campaign period magsugod sa Oktubre 18 hangtud Oktubre 26.
Dugang pa ni Beniga, gipangandaman na usab nila ang mga posibleng adjustment nga mahitabo sama sa posibleng dili mahinayon ang SK eleksyon ug ang pagdagsa sa mga mo-file nga kandidato.
Ang barangay ug SK eleksyon gitakda nga ipahigayon karong Oktubre 28. (PIA-Bohol/ecb)
