TAGBILARAN CITY, Bohol, Aug. 07 (PIA)–Gitakdang molagda og usa ka Memorandum of Understanding (MOU) ang tulo ka ahensya sa gobyerno alang sa pagpatuman sa ‘unified registration system’ alang sa mga kasambahay.
Matud pa ni Labor Secretary Rosalinda Baldoz, nagkauyon ang Social Security System, Philhealth ug Pag-Ibig Fund agig pagsunod na usab sa gitakdang Kasambahay Law.
Gipasabot ni Baldoz nga ubos sa maong sistema, mahimong dali nalang alang sa mga employer nga iparehistro ang ilang mga kasambahay o katabang sa SSS, Philhealth ug Pag-Ibig Fund tungod kay dili na nila kinahanglan pang muadto sa mga nahisgotang ahensya aron makig-transaksyon.
Kini nagpasabot nga kun naparehistro na ang employer ang iyang kasambahay sa SSS, tanang mga impormasyon ipa-ambit sa ahensya sa Pag-Ibig ug Philhealth.
Gibutyag usab sa kalihim nga nga nagpagawas na ang Department of Interior and Local Government (DILG) og Memorandum Circular 2013-61 nga nagtakda og sumbanan alang sa pagpatala sa mga kasambahay sa tanang barangay sa tibuok nasud.
Ang maong DILG circular ang mahimong giya alang sa tanang mga Mayor ug Kapitan sa Barangay alang sa local nga pagparehistro sa mga kasambahay nga gitakda usab sa balaod. (PIA-Bohol/ecb)
