TAGBILARAN CITY, Bohol, July 16 (PIA)–Gi-uswag pa sa Korte Suprema karong adlawa, Martes ang status quo ante order (SQAO) sa kontrobersyal nga Responsible Parenthood and Reproductive Health (RH) Act.
Matud pa sa SC public information office, nahuman ang botohan sa mga mahistrado sa 8-7 pabor sa “indefinite extension” sa SQAO.
Gitakda ang usa pa ka oral arguments sa Hulyo 23.
Una nang nipagawas og 120 ka adlaw nga SQAO ang Korte Suprema niadtong Marso.
Niadtong Abril, gibasura sa Korte Suprema ang gidusong petisyon ni kanhi Akbayan party-list representative Risa Hontiveros aron ilibkas ang suspension order.
Si Deputy Presidential Spokesperson Abigail Valte nihulagway sa maong extension sa SQAO sa RH law nga “unfortunate,” apan mipasalig nga ang administrasyon mutahod sa desisyon sa korte. (PIA-Bohol/ecb)
Mga nilampos nga science scholar,
prayoridad i-hire sa mga public high school
TAGBILARAN CITY, Bohol, July 16 (PIA)–Nipagawas og memorandum ang Department of Education (DepEd) kalabot sa pagpang-hire sa mga bag-ong magtutudlo sa Mathematics ug Science-related subjects sa mga pampublikong tunghaan.
Base sa DepEd memorandum 114 Series of 2013 alang sa mga regional director, prayoridad nga i-hire aron mahimong magtutudlo sa sekondarya ang mga nakalampos sa Department of Science and Technology (DOST) Science Education Institute Scholarship Program.
Pasabot ni DepEd Sec. Armin Luistro, ang mga iskolar sa DOST Science Education Institute milagda sa kasabotan nga kun molampos sila sa kurso, obligado silang magtudlo sa public high school kun diing rehiyon sila naggikan.
Giingong katumbas kini og pila ka tuig nilang gipahimoslan ang maong scholarship program.
Gitin-aw usab sa kalihim nga kinahanglan pa gihapong mopasar sa Licensure Examination for Teachers (LET) ang mga natapos nga science scholars aron mahatagan sila og permanenteng posisyon. (PIA-Bohol/ecb)