PINAAGI sa duha ka Acta Republica, napataas ang sweldo sa mga abogado nga nag-alagad sa kagamhanan diha sa Buhatan sa Public Attorney ug sa Buhatan sa Solicitor General.
Pinaagi sa Republic Act 9406 o ang akta nga nga re-organize ug nagpalig-on sa Public Attorney’s Office (PAO) ug sa Acta Republika 9417 nga nagpalig-on sa Office of the Solicitor General, napatuman na ang dugay nang gipangandoy sa mga abogado sa duha ka buhatan.
Matud ni Department of Justice (DOJ) undersecretary Ricardo Blancaflor, ang duha ka mga balaod bunga sa paningkamot sa DOJ ug sa panaghisgutay aron kunhoran ang dako nga diperensya sa sweldo sa mga manlalaban sa kagamhanan ug sa mga pribadong abogado.
Ang manlalaban sa kagamhanan nagsweldo lamang ug P25 mil ngadto sa P30 mil agi ug binuwan nga sweldo samtang halos doble ug triple pa ang kita-on sa usa ka pribadong abogado.
Sumpay ni Blancaflor, ang kabag-ohang dala ning mga nahisgutang balaod magpasayon usab sa kagamhanan pagpangaghat ug sa pagpanawat ug mga maayong abogado. (rachiu/PIA)