TAGBILARAN CITY, Bohol, June 28 (PIA)–Mikunhod ang gidaghanon sa mga Pinoy nga nagtuong kabus sila.
Base sa labing ulahing survey sa Social Weather Stations (SWS) nga gipahigayon niadtong Mayo 24 hangtud 27, migawas nga mi-ubos sa 10.3 milyong pamilyang Pinoy o 51-percent sa respondents ang miingon nga kabus sila kun itandi sa 11.1 milyong pamilyang Pinoy o 55-percent nga natala niadtong Marso.
Matud pa usab sa maong survey nga gi-apilan sa 1,200 ka respondents, mas daghang taga-rural areas ang miingon nga naglisud sila nga mikabat sa 61-percent kun itandi sa 42-percent nga urban respondents.
Samtang migawas usab sa SWS survery nga mikunhod ang gidaghanon sa mga pamilyang Pinoy nga nagtuong naglisud sila sa ilang pagkaon.
Gikan sa 45-percent o 9.1 milyong pamilyang Pinoy niadtong Marso, mikunhod na sa 39-percent o 7.9 milyong pamilya ang gipanggutom.
Gitataw sa SWS nga bisan mi-uswag ang kahimtang sa kadaghanan sa mga Pinoy, daghan pa gihapon sa ilang mga nahinabi ang padayon nga nagdaginot. (PIA-Bohol/ecb)
Bag-ong LPA, mosulod sa nasud sa Domingo
TAGBILARAN CITY, Bohol, June 28 (PIA)–Bisan hingpit nga wala pa nakagawas sa Philippine area of responsibility (PAR) ang Bagyong Dindo, may bag-ong dautang panahon na usab nga gibantayan ang Philippine Atmospheric, Geophysical and Astronomical Services Administration (PAGASA).
Sa usa ka press conference sa kaulohan, gibutyag ni PAGASA weather forecaster Nathaniel Servando nga posibleng mosulod sa Philippine area of responsibility (PAR) ang bag-ong low pressure area (LPA) nga nasigpatan duol sa Mindanao.
“Inaantabayanan natin, mayroon pong namumuong sama ng panahon dito po sa Caroline Islands sa may Micronesia, silangan po ‘yan ng Mindanao. May kalauyan pa po pero inaasahan natin na ito po ay papasok sa Philippine area of responsibilty around Sunday kaya patuloy po ang ating pagbabantay,” matud pa ni Servando.
Matud pa usab ni weather forecaster Robert Sawi nga ang maong LPA mas kuyaw tungod sa daku ang posibilidad niining mo-igo sa kayutaan.
Sa higayon nga mosulod sa PAR ang gibantayang bagyo, hinganlan kini og “Enteng.” (PIA-Bohol/ecb)
411-2292/ 501-8554/ 0920 954 5482 email piabohol171@yahoo.com
Hulyo 2, special non-working day sa syudad sa Tagbilaran
TAGBILARAN CITY, Bohol, June 28 (PIA)–Gi-deklarar ni Presidente Benigno S. Aquino III ang Hulyo 2, Lunes isip usa ka special (non-working) day sa syudad sa Tagbilaran sa lalawigan sa Bohol sa kasaulogan sa ika-46 niini nga Charter Day.
Gipagawas sa Presidente ang deklarasyon pinaagi sa Proclamation No. 417 nga gilagdaan ni Executive Secretary Paquito N. Ochoa Jr. niadtong Hunyo 27, aron mahatagan og kahigayonan ang katawhan sa syudad sa Tagbilaran nga isaulog ug mokaapil sa mga kalihokan alang sa kasaulogan niini.
Ang syudad maghandom sa ilang Charter Day sa Hulyo 1, nga natunong sa adlaw nga Domingo.
Gihatagan og pagtugot ni Presidente Aquino ang hangyo sa 11th Sangguniang Panlungsod nga ideklarar ang Hulyo 2 nga special (non-working) day sanglit nga Hulyo 1 sa syudad.
Nahimong chartered city ang syudad sa Tagbularan niadtong Hulyo 1, 1966 pinaagi sa Republic Act No. 4660. (PIA-Bohol/ecb)
Tips kun adunay kilat
TAGBILARAN CITY, Bohol, June 28 (PIA)–Usa matag 600,000 ka tawo lamang ang posibleng maigo og kilat apan ning bag-o lang, daghan ang mga naigo sa ‘killer’ kilat.
Tungod niini, nihatag og tips ug mga tambag ang Philippine Atmospheric, Geophysical and Astronomical Services Administration (PAGASA) aron malikay ang publiko sa disgrasya.
Kun kusog ang ulan nga adunay dalugdog ug kilat, likayan gayud ang mga taas nga lugar tungod kay giingong kasagaran maigo sa kilat ang tag-as nga butang.
Magpalayo usab sa mga butang nga agianan og elektrisidad o mga conductors of electricity sama sa tubig, metal structures, linya sa kuryente ug telepono.
Kun naa usab sa tunga-tunga sa bukid ug kalit lang mokilat, dili angay nga mohigda apan angay moduko na lang ug tabunan ang dalunggan.
Giingong dili angay gunitan ang tuhod o ang yuta tungod kay mas giingong moagi ang kuryente nga dala sa kilat sa atong lawas.
Ayaw usab tupad o gunit sa punoan sa kahoy tungod kay ang kilat moigo man sa tunga sa punoan kun dili sa kilid niini.
Gipasabot ni Pagasa weather forecaster Jori Louiz nga kun ang tawo naa tupad sa kahoy, daku ang kahigayonan nga makuryente kini ilabi na kun naa kini nahimutang sa dapit nga may nakagawas nga gamut.
Kun naa usab sulod sa balay, angay mopalayo sa bintana ug ayaw guniti ang kable sa kuryente ug telepono ug tubo nga adunay tubig.
Gipasidan-an usab ang publiko sa partikular nga matang sa gabon nga gitawag og “Cumulonimbus Cloud” nga may dalang kusog nga hangin, pag-ulan ug pagkilat. (PIA-Bohol/ecb)