MALAMPUSON ang tumong sa lakaw ni President Gloria Macapagal Arroyo sa Syria, kon ang basehan mao ang pagtugot sa Organization of Islamic Conference (OIC) nga mamahimong observer sa mga kasabutan sa mga nasud nga Muslim.
Sa samang pagtugot, nakab-ot sa Pilipinas ang mas lapad nga tsansang masuportahan sa pangindahay niini nga kab-oton ang tunhay nga kalinaw sa Mindanao, nga karon gihulga sa kagubot sa mga bahan nga Muslim.
Subay sa taho, si Press Secretary Cerge Remonde mibutyag nga may 57 ka Muslim nga nasud ang sakop sa OIC. Dugang niya, may komitiba na nga naghipno sa pamaagi sa pagsulod sa Pilipinas sa umaabot nga tigum sa OIC sa Mayo 23-25.
Mas halapad nga suporta usab ang gipaabot sa Pilipinas sa nga sakop sa OIC aron hingpit nang mapalinaw ang Mindanao. Lakip na niini ang pagpahiluna sa hisgutay sa kalinaw tali sa kagamhanan sa nasud ug sa mga rebeldeng Moro Islamic Liberation Front (MILF). (rachiu/PIA)
