TAGBILARAN CITY, Sept. 14 (PIA)– WALA usa ipadayon sa Department of Interior and Local Governemnt (DILG) ang screening sa mga aplikante aron mahimong nominado nga officer-in-charge (OIC) sa Autonomous Region in Muslim Mindanao (ARMM).

Tungod kini sa gipagawas nga temporary restraining order (TRO) sa Korte Suprema batok sa balaod nga pag-oktaba sa piniliay sa ARMM ug naghatag og gahum sa Presidente nga magbutang og mga OIC sa rehiyon.

Sa pakighinabi sa radyo kang Interior and Local Government Secretary Jesse Robredo, miingon kini nga isip respeto na usab sa Korte Suprema mao nga i-undang una nila ang ilang screening process hangtud dili pa sila makakuha sa kopya sa maong desisyon.

Matud pa ni Robredo nga dili pa klaro alang kanila kun gi-bawalan usab ang pagpahigayon sa  screening process sa pagpili sa mga nominado.

Giingong kun dili kini bawal, ipadayon nila ang proseso aron kun ibasura sa Korte Suprema ang petisyon nga mi-kwestyon sa maong balaod, aduna nay paga-pilian nga mga ibutang nga  ARMM OIC. (PIA-Bohol/ecb)