BEPO nipahimangno batok sa mga illegal recruiters
Tagbilaran City, May 25 (PIA) – Gipahimangnuan sa Bohol Employment and Placement Office
(BEPO) ang mga Bol-anon sa pagseguro nga makigsabot-sabot una sa mga lihitimo nga mga
recruitment agencies aron dili mailad sa mga illegal recruiters sa pagdali-dali nga makatrabaho
sa gawas sa atong nasud.
Ang hepe sa BEPO nga si Romulo Tagaan mipahimangno nga adunay mga ahensya nga
padayon nga nangdawat sa buot mo trabaho sa gawas sa nasud nga wala gani mosusi kun unsa
nay kahimtang sa mga trabahador nga gipadala niini sa gawas.
Dugang sa OFW Help Desk, tukoron na usab sa BEPO sa dili madugay ang Anti-illegal
Recruitment Desk aron makalikay ang mga Bol-anon nga mabiktima sa pag-apply sa
pagpanrabaho sa gawas nga gikan sa mga illegal recruiters.
Gitambagan ni Tagaan ang tanang mga nangita og trabaho sa paglikay sa dili katohuan nga mga
haylo sa mga recruitment agencies tungod kay dili man pagtabang ang ilang gihimo.
Dugang pa ni Tagaan, angay usab nga likayan sa mga nangita og trabaho ang makigsabot-sabot
sa mga pribadong balay, ug angay magbantay nga ang balaod nag-require og special recruitment
authority ug approval gikan sa POEA ug angay nga pagahimuon sa luwas ug pampublikong lugar
sama sa munisipyo o city hall, mga buhatan sa PESO sa kalungsoran o sa Kapitolyo.
Gitambagan usab niya kadtong mo trabaho sa gawas nga kinahanglang magpakisusi una sa
buhatan sa BEPO, DOLE o POEA aron malikayan ang mga illegal nga recruiters.
Ning bag-o lang, ang pamilya sa usa ka Bol-anon nga si Bernadeth Dano, usa ka domestic helper
sa Qatar nangayo og pakitabang tungod sa gidangatan niini nga giingong gipaalagad sa tulo ka
agawon, wala gipagawas sa balay ug gipakaon lamang ka usa sa usa ka adlaw. (PIA-Bohol/ecb)
