by boholbalita | Oct 11, 2010 | Headlines, Local News / Bohol Balita
GIMANDUAN ni Bohol Provincial Police director, Senior Supt. Constantino Barot Jr. ang mga hepe sa 47 ka lungsod lakip na ang dakbayan sa Tagbilaran nga mangandam alang sa umaabot nga barangay ug Sangguniang Kabataan eleksiyon karong Oktubre 25.
Atol sa gihimong conference kagahapon didto sa Kampo Dagohoy, gipasidan-an ni Barot ang mga hepe nga mohimo s pagsusi kalabot sa mga barangay nga giingong dunay panagsungi sa mga kandidato.
Nihatag usab si Barot og mga guidelines ug mga polisiya sa umaabot nga piniliay ug lakip na niini ang pagpakatap sa mga personahe sa kapulisan sa mga kabarangayan atol sa maong kalihukan.
Dugang niini nga dunay mga tropa sa mga pulis gikan sa rehiyon ang idugang nga puwersa sa umaabot nga eleksiyon. (Andy Nalzaro)
by boholbalita | Oct 8, 2010 | Local News / Bohol Balita
NAMATAY ang usa ka piniriso human giatake sa iyang sakit didto sa Carmen District Jail sa lungsod sa Carmen kagahapon sa kaaadlawon.
Biktima nailhan nga si Brasil Bobet, 33, minyo, taga-barangay bagumbayan, Pilar, Bohol.
Nasayran sa taho nga ang biktima kinsa napriso gumikan sa kalapasan sa Republic Act 9165 kun illegal drugs gumikan sa paghupot og marijuana ug ang kaso niini nagpadayon sa Regional Trial Court branch 51 sa maong lungsod gikatahong naglisud og ginhawa pasado alas 2 sa kabuntagon ug daling gihatud sa jailguard didto sa congressman Toribio memorial Hospital apan nabugtyuan sa iyang kinabuhu mga alas 4;30 sa buntag.
Si PO2 Giovanni Rios, imbestigador sa Carmen Police Station nibutyag sa Bohol Balita nga sigun sa findings sa mananamal sa naasoy nga hospital nga severe pneumonia ang hinungdan sa kamatayon sa maong piniriso.
Matud ni Rios nga walay nagpaluyo nga tinunto sa kamatayon niini gumikan kay wala nakit-an nga bun-og o mga garas sa patay’ng lawas.
Gidala ang patay’ng lawas sa nahisgutang biktima sa iyang mga paryente didto sa barangay Bagumbayan, Pilar. (Andy Nalzaro)
by boholbalita | Oct 8, 2010 | Local News / Bohol Balita
suspek naitok kay gikasab-an sa biktima
GRABENG hingsamdan ang usa ka ginang human gidunggab sa iyang bayaw nga lalaki dihang gikasab-an human gisumbag sa maguwang sa suspetsado atol sa anti-desperas didto sa barangay Bongcogan Ubos, Lila, Bohol niadtong Lunes sa gabii.
Ang biktima nga si Marissa Adanza, 35, live-in partner sa maguwang sa suspetsado, nagpuyo sa maong dapit, naigo sa buko-buko ug padayon pang giatiman didto sa Gov. Celestino Gallares Memorial Regional Hospital sa dakbayan sa Tagbilaran.
Suspetsado nailhan nga si Jennifer Acaso, 22, ulitawo, lumad sa barangay San Isidro, Pilar, Bohol ug kasamtangang nagpuyo sa maong dapit.
Sa taho sa kapulisan nagbutyag nga samtang ang suspetsado kauban sa iyang mga higala nagtagay mga alas 5 sa hapon dihang niduol kaniya ang iyang maguwang nga lalaki nga si Rene Acaso kinsa lango sa ilimnong makahubog ug gisumbag.
Matud sa taho nga nipauli ang suspetsado sa ilang pinuy-anan apan gisugat kini og kasaba sa biktima hinungdan nga nagkalalis.
“Niinit ang ulo sa suspek hinungdan nga gidunggab, ” asoy pa ni Inspector John Gelbert Basalo, hepe sa Lila Police Station ngadto sa Bohol Balita.
Niingon si Basalo nga narikober sa iyang mga sakop ang usa ka kutsilyo nga dunay gitas-on nga 13.5 pulgadas nga maoy gigamit sa krimen didto sa dapit nga nahitaboan.
Nisibat ang natumbok nga suspek apan nadakpan human nasigpatan duol sa ilang pinuy-anan. (Andy Nalzaro)
by boholbalita | Oct 8, 2010 | Local News / Bohol Balita
KOLEKTOR sa usa ka kompaniya sa lending gitulis sa duha ka wala mailhing armadong lalaki didto sa barangay Bugsok, Sierra-Bullones, Bohol kagahapon sa ala-una sa hapon.
Biktima nailhan nga si Noel Isiang, 22, ulitawo, taga-Poblacion, Tubigon, Bohol ug kolektor sa RT Lending nga nakabase didto sa lungsod sa Guindulman.
Sigun sa asoy sa biktima nga samtang siya nagsakay sa iyang serbis nga motorsiklo gikan sa maong dapit dihang kalit lamang gibabagan sa duha ka mga lalaki nga armado og usa ka shotgun ug usa ka kalibre .45 nga pistola.
Matud sa taho nga ang lalaki nga nagbitbit og kalibre .45 nga pistola nga walay maskara nition kaniya ug nideklarar og tulis ug gihulgang pagapatyon kun magpakita sa iyang pagsukol.
Gikuha gikan sa maong biktima mao ang iyang koleksiyon nga mokabat ngadto sa P12,000 lakip na ang iyang Nokia cellphone nga mobalor og P5,000.
Pagkahuman niini, gikuha usab sa mga tulisan ang Honda Wave 100 kolor asul nga motorsiklo nga may plaka OF-7482 gikan sa biktima ug gisakyan sa mga suspek kinsa nisutoy paingon sa nasudnong dalan sa maong lungsod.
Dugang sa taho nga narikober sa mga niresponding kapulisan ang maong sakyanan nga gibiyaan didto sa nasudnong dalan sa barangay San Juan sa samang lungsod.(Andy Nalzaro)
by boholbalita | Oct 4, 2010 | Headlines, Local News / Bohol Balita
SI Police Inspector Noel Colipano Abalde, kasamtangang hepe sa Panglao Police Station sa lungsod sa Panglao kinsa maoy nangulo sa pagkasikop sa unom ka gidudahang tulisan didto sa lungsod sa Loon maoy napiling most outstanding chief of police sa probinsiya sa Bohol.
Nasayran sa Bohol Balita nga si Abalde maoy gi-nominate sa Administration Division sa Bohol Provincial Police Office ubos ni Supt. Jeffrey Caballes nga maoy mopresentar sa Bohol PNP alang sa Second Lead PNP Awards sa Rehiyon 7.
Si Abalde, 27-anyos natawo sa dakbayan sa Toledo, probinsiya sa Sugbu ug nigraduwar sa Philippine National Police Academy niadtong 2007.
Sukad niadtong 2008 nisilbi siya isip hepe sa tulo ka police station sa lungsod sa Getafe, Balilihan ug Panglao.
Sa pagdestino niya sa Getafe, atol sa iyang paglingkod, nakasulbad siya og usa ka kaso sa pagpatay sa wa pa moabot ang 24 oras gikan sa pagkahitabo sa krimen diin ilang nadakpan ang suspetsado didto sa barangay Cabasakan.
Lakip nga iyang nasikop mao ang kaso sa sexual abuse, kawat, ilegal nga druga, illegal possession of firearm, illegal fishing, illegal cutting of trees ug uban pa.
Gipatuman usab niya ang “No Plate, No Travel Policy diin nakasikop sila og daghang mga sakyanan nga walay plaka ug gi-impound sa police station.
Dihang nadestino siya didto sa lungsod sa Balilihan, nakasulbad usab siya sa kasong homicide gumikan sa rekless imprudence, mga kasong robbery ug pagkaugkat sa patay’ng lawas sa usa ka bata nga na-missing sa usa ka suba sa utlanan sa Balilihan ug Antequera.
Lakip nga iyang nahimo mao ang pagkasikop sa mga tawo nakahimo og salaud sa illegal fishing ug illegal logging ug pagakasakmit sa pito ka botelya nga may sud nga explosibo.
Sa iyang pagkadestino sa lungsod sa Panglao, aktibong nisalmot si Abalde sa kalihukan sa komunidad pinaagi sa aktibong police visibility sa maong dapit. Lakip niini mao ang SCUBAsurero, Coastal Clean-Up. Nakig-tie-up siya sa mga German nationals ug ubang mga langyaw nga nagpuyo sa lungsod diin ang tuyo niini mao ang pagpanalipod sa kalikupan sa dagat.
Aktibong lecturer ug organizer usab si Abalde sa mga pagbansay-bansay sa barangay tanod sama sa Barangay Tanod Skills and Enhancement Seminar diin maoy hinungdan sa pagkaugmad sa Barangay Peace Action Team didto sa Getafe ug Balilihan.
Gumikan niini, nakahimo si Abalde sa pag-pioneer sa aktibong partisipasyon sa Barangay Tanod sa Bohol kalabot sa public safety.
Nakahimo usab si Abalde sa pagsulbad sa pagtulis ug pagpatay sa usa ka Italyanong nasyunal sa Panglao diin nadakpan ang responsable niini.
Apan ang pinakadakong nahimo ni Abalde dihang siya ang nangulo sa pagkasikop sa unom ka gidudahang mga tulisan kinsa maoy responsable sa sunod-sunod nga tulis sa probinsiya sa Bohol niadtong Agosto 26, 2010 didto sa barangay Catagbacan Sur, Loon, Bohol.
Si Abalde kansang motto sa iyang pagtapos sa academy nga nag-ingon ” I will fight and depend my country for God’s glory nag-ingon nga kini mao lamang ang sinugdanan sa iyang karera isip usa ka opisyal sa pulis. (Andy Nalzaro)
