by boholbalita | Jul 10, 2010 | Local News / Bohol Balita
MAGTIAYON nga negosyante nakalingkawas sa pagsuway sa pagtulis kanila sa duha ka armadong lalaki didto sa barangay Magsaysay, Sevilla, Bohol niadtong Huwebes sa hapon.
Giila ang mga biktima nga sila si Conrado Marasigan, 43-anyos, minyo ug ang iyang asawa nga si Arlene Marasigan, 37-anyos, nagnegosyo og lumber ug taga-barangay Cogon, Balilihan, Bohol.
Nasayran sa taho nga samtang ang mga biktima nagsakay sa ilang multicab nga gimanehoan ni Conrado mga 1:30 sa hapon ug nagdagan sa barangay road sa maong dapit dihang kalit nga nibutho ang mga suspetsado usa niini armado og de kalibre nga pistola ug nimandar og pahunong.
Matud sa taho nga gimanduan sa mga suspek si Arlene nga itunol ang iyang shoulder bag nga may sulod nga salapi apan nibalibad ang naulahi hinungdan nga nagbinunlotay ug nakiglayog ang biktima sa maong tulisan nga nanawag og pakitabang sa ilang back-up nga nitago sa kasagbutan nga bahin apan wala kini niduol hinungdan nga nakahigayon og padagan si Conrado ug nipasirit sa ilang sakayanan pahilayo.
Gipusil ang mga biktima sa suspek apan wala kini makaigo.
Apan ang duha sa mga suspetsado nadakpan sa gihimong hot pursuit operation sa mga sakop sa Sevilla Police Station sa duha ka managlahing lugar sa dakbayan sa Tagbilaran kagahapon sa buntag.
Si Senior Inspector Basiledes Balistoy, hepe sa Sevilla PNP kinsa maoy nangulo sa operasyon niila sa mga suspetsado nga sila si Ariel Dugoy alias Aye, 19-anyos, ulitawo ug taga-Hanopol, Balilihan, Bohol ug Alberto Yugo, hamtong ang panuigon ug taga-barangay Cambagui, Sevilla, Bohol.
Matud ni Balistoy nga si Dugoy nadakpan mga alas 6 sa buntag didto sa balay sa iyang uyoan sa Sacred Heart Village sa barangay Cogon sa siyudad samtang si Yugo didto nadakpan sa bunkhouse sa Tagbilaran Community Hospital.
Ang duha gidala didto sa Sevilla samtamg tukmang sumbong giandam pa aron ipasaka sa piskaliya. (Andy Nalzaro)
by magnolia_eic | Apr 28, 2010 | Local News / Bohol Balita
Tubigon — Patay ang usa ka mag tiayon, ang asawa buntis, human ang motorsiklo nga ilang gisakyan aksidenteng nibangga sa usa ka de pasaheroang bus nga naka-parking sa karsada didto sa barangay Ilijan Norte, Tubigon, Bohol niadtong Dominggo sa gabii. Ang mga biktima nailhan nga sila Ryan Jumamil, 28 anyos, minyo ug ang buntis niyang asawa nga si Feliza Jumamil, 26-anyos, nagpuyo sa barangay Calunasan, Calape, Bohol. Naka angkon ang duha ug grabeng samad sa ulo ug ubang bahion sa ilang lawas ug gidiklarang patay na sa dihang nadangat sa Tubigon Community Hospital.
Nasayran sa taho nga samtang ang isa ka Titi Transport Bus nga may body number 258 ug plaka numero GVL-419 nga gipanag-iyahan ni Jesus Veloso, taga Catagbacan Sur, Loon, Bohol ug gimanehoan ni Tito Corbeta, 57-anyos, minyo ug nagpuyo sa samang dapit gikan sa Tubigon ug samtang nagparking ang maong sakyanan sa tuong bahin sa kalsada mga 6:35 sa gabii aron mo-drop ug pasahero, kalit na mibangga ang usa ka Honda XRM kolor itom nga motorsiklo nga dunay plaka MC6493KH ug gimanehuan ni Jumamil didto sa sampot sa bus.
Matus sa taho nga gumikan sa kakusog sa bangga, napasok ang motorsiklo sa ilalom sa maong bus ug nangalagpot ang magtiayon didto sa karsada.
Sigun sa taho nga si Jumamil walay lisensya sa pagmaneho ug waala nagsul-ob ug crash helmet sama sa iyang asawa.
Naguba ang motorsiklo sa biktima samtang ang driver sa natumbok nga bus gikustodiya na sa Tubigon Police Station. (Andy Nalzaro)
by boholbalita | Apr 27, 2010 | Local News / Bohol Balita
Dakpan ang gidudahang usa ka suertres coordinator human gironda sa bahan sa kapulisan ang usa ka balay didto sa barangay Campo Oriental, Getafe, Bohol niadtong milabay nga Miyerkulis.
Giila ang suspetsado nga si Felix Degamo, hamtong nag panuigon.
Sigun sa taho nga ang balay nga gitaguan sa suspek gironda sa hiniusang mga sakop sa Criminal Investigation and Detection Team kun CIDT-Bohol ubos sa pagpangulo ni Chief Inspector Germano Mallari ug sa Getafe Police Station mga alas 10 na sa gabie pinasikad sa alias search warrant nga gipirmahan ni Maghuhukom Irmazita Masamayor sa Regional Trial Court Branch 52 nga nakabase didto sa Lungsod sa Talibon.
Nasakmit gikan sa balay nga gipanag-iyahan sa usa ka Ariel Anzano mao ang 55 ka tally sheets sa ilegal nga sugal nga suertres, 11 kabuok nga tip nga penetsahan ug Abril 21, 2010 ug salapi nga P2,300 nga gituhuang taya ug uban pang paraphernalia sa maong sugal. Gidala ang natumbok nga suspek sa CIDT ug gikustodya didto sa Kampo Dagohoy. (Andy Nalzaro)
by boholbalita | Apr 27, 2010 | Local News / Bohol Balita
Usa ka 65-anyos nga lolo kinsa dunay giatunabang nga kasong child abuse sa hukmanan gidakop sa kapolisan didto sa iyang pinuy-anan sa Sitio Suba, barangay Centro Tubigon, Bohol niadtong miaging adlaw..
Ang suspetsado nailhan nga si Sergio Narvasa, minyo, usa ka retiradong revenue collector.
Nasayran sa taho nga ang suspetsado gisikop sa mga sakop sa Tubigon Police Station mga alas 8 sa buntag niadtong Huwebes human nipagula og orden de aresto si Maghuhukom Teofilo Baluma sa Regional Trial Court Branch I nga naka base sa dakbayan sa Tagbilaran. Ang maong warrant penetsahan ug Abril 13, 2010.
Sigun sa taho nga ni -apply ug probation ang maong akusado sa naasoy nga hukmanan apan wala kini tugoti sigun ni SPO3 Ferenando Peroramas sa Tubigon.
Dugang ni Peroramas nga nahukman na usab ang akusado ngadto sa unom ka bulan nga pagkabilanggo ug dunay penalty nga P5,000 nga gipahamtang sa maong korte. (Andy Nalzaro)
by boholbalita | Apr 23, 2010 | Election 2010, Headlines, Local News / Bohol Balita
Nagpaabot si presidential candidate Senator Manny Villar sa Nacionalista Party sa desisyon ni Gob. Erico Aumentado aron motapo iyang grupo sa di ma moabot ang adlaw sa piniliay karong Mayo 2010.
Kini maoy gipadayag ni Villar dihang gipangutana sa mga sakop sa media didto sa Bohol Tropics atol sa iyang pagduaw sa lalawigan sa Bohol niadtong Miyerkulis.
Matud ni Villar, nga iyang suod nga higala si Aumentado dihang siya pa ang speaker sa balay balauran atol sa administrasyon ni kanhi presidente Joseph Estrada ug abli pirmi ang iyang pultahan kun mopadayag na kini nga molukso sa iyang partido.
Apan gibutyag ni Villar nga kasagaran sa mga mayor nga niluhar kaniya pulos mga kaalyado sa gobernador hinungdan nga dili gayud kalikayan nga magduda ang mga katawhan nga siya gayud ang gisuportahan niini. “Basahin mo ang mga mayor, di ba mga supporter sila (Aumentado)”, asoy pa ni Villar.
Si Aumentado kinsa sakop sa administrasyong Lakas-Kampi-CMD nidagan isip kongregista sa ikaduhang distrito sa Bohol diin siya nitukod sa iyang grupo nga Lakas-Aumentado Wing human sa ilang panagbangi sa gubernatorial candidate, Kongresista Edgar Chatto ug Kongresista Ondoy Cajes.
Niining bag-o nitukod na usab ang ang grupo ni Aumentado ug Herrera ug Grand Alliance nga gikalungkaban sa mga ubang partido sama sa Liberal Nationalist People’s Coalition aron kontrahan ang tinguha ni Chatto sa pagka-gobernador.
Ang gobernador gihimong guest candidate nila bise gobernador Herrera ug manlalaban Tomas Abapo kinsa magpapili isip gobernador ug bise gobernador sa umaabot nga eleksyon. (Andy Nalzaro)
