by magnolia_eic | Jul 30, 2011 | Headlines, National News
TAGBILARAN CITY, Bohol, July 29 (PIA) – ANDAM ang kagamhanan nga hatagan og seguridad ang grupo ni Sr. Supt. Rafael Santiago nga motestigo sa pagpanikas niadtong tuig 2004 nga piniliay. Matud pa ni Presidential Spokesperson Edwin Lacierda, usa ka dakung tabang ang
paggawas ni Santiago aron mahuman ug masara na ang isyu sa pagpanikas sa piniliay.
Sigun usab kang Philippine National Police (PNP) Spokesperson Agrimero Cruz Jr., dili pa luwas ang mga retiradong polis nga kauban ni Santiago sa pag-switch sa election returns (ER) niadtong tuig 2004 elections. Giingong ilegal ang gihimo nila mao nga posibleng ipatawag usab sila sa PNP.
Sa nahibaw-an usab ni Cruz, duha na lamang sa mga nakauban ni Santiago sa special operation niini niadtong tuig 2005 ang nagpabiling aktibo sa PNP. (PIA-Bohol/ecb)
by magnolia_eic | Jul 21, 2011 | Headlines, National News
TAGBILARAN CITY, Bohol, July 21 (PIA)–Gikumpirma ni Commission on Elections (Comelec) Chairman Sixto Brillantes nga naa na sa Kampo Crame ang tulo ka testigo nga giingong mosuporta sa gibutyag ni kanhi Maguindanao Election Supervisor Lintang Bedol kalabot sa giingong pagpanikas sa piniliay niadtong tuig 2004 ug 2007. Matud pa ni Brillantes, kauban niini ang ilang abogado sa Comelec aron mokuha pa og dugang pahayag sa tulo ka testigo.
Gitataw usab ni Brillantes nga wala sa Philippine National Police (PNP) Custodial Center ang tulo apan naa sa usa ka buhatan sa Kampo Crame.Giseguro usab ni Brillantes ang seguridad sa tulo tungod kay mga empleyado pa gihapon sila sa Comelec. Nauna nang giila ang tulo ka testigo nga sila Saliao Amba, acting Election Officer sa Shariff Saydona sa Mustapha, Maguindanao; Magsaysay Mohamad, Chairman sa Municipal Board of Canvassers sa Sultan Barongis, Maguindanao; ug Salonga Edzela, computer voter’s list technician sa Maguindanao Provincial
Election Office. (Translated into Bol-anon by Elvira Bongosia/PIA-Bohol)
by magnolia_eic | Jul 18, 2011 | Headlines, National News
TAGBILARAN CITY, Bohol, July 18 (PIA)–Mohimo og imbestigasyon ang Commission on Elections (Comelec) sa mga gibutyag nilang kanhi Maguindanao Election Supervisor Lintang Bedol ug kanhi Autonomous Region in Muslim Mindanao (ARMM) Governor Zaldy Ampatuan kalabot sa mga giingong pagpanikas niadtong tuig 2004 ug 2007 nga piniliay.
Matud pa ni Comelec Commissioner Armando Velasco, angay nga matuldukan na ang mga alegasyong pagpanikas sa mga milabay nga piniliay. Gitumbok usab ni Velasco nga angay nga adunay ikapakita nga mga dokumento silang Bedol ug Ampatuan aron mapamatud-an nga dunay nahitabong pagpanikas.
Samtang mag-isyu ang Comelec og alias warrant of arrest batok ni Bedol alang gihapon sa kasong contempt nga gipasaka batok niya sa komisyon. Miingon si Comelec Chairman Sixto Brillantes nga napaso na niadtong tuig 2008 ang unang warrant of arrest nga gi-isyu kaniya sa komisyon niadtong tuig 2007. Kahinomduman nga nauna nang napahamtangan og unom ka bulan nga pagkabilanggo si Bedol alang sa kasong contempt tungod sa wala pagpakita niini sa mga gipatawag nga pagdungog kaniadto sa Comelec. (PIA-Bohol/ecb)
