by magnolia_eic | Jul 6, 2011 | Headlines, National News
TAGBILARAN CITY, Bohol, July 5 (PIA)–Migawas sa mga dokumento gikan sa Philippine Charity Sweepstakes Office (PCSO) nga sila si Kongresista Erico Aumentado ug Talibon Mayor Roberto Cajes milampos sa pagpagawas sa mga ambulansya alang sa ilang mga dapit isip mga gipaboran nga kaalyado sa administrasyon ni kanhi Presidente Gloria Macapagal Arroyo.
Ang maong taho napatik sa mga nasudnong pamantalaan nga mihingan ni Aumentado nga apil sa 65 ka mga gobernador nga Pro-Arroyo nga nakakuha sa labing daghang ambulansya atol sa katapusang upat ka tuig sa administrasyong Arroyo. Si Aumentado nakadawat sa 12 ka ambulansya isip gobernador sa Bohol diin ang lalawigan mipas-an sa 40% nga kantidad sa ambulansya. Samtang si Cajes nga naapil sa 29 ka mga Kongresista nga gipaboran sa mga tawo ni Arroyo nakadawat og usa ka ambulansya alang sa iyang distrito sa Bohol.
Ang tanang 29 ka mga Kongresista ug pipila ka mga gobernador, gawas ni Aumentado gikataho nga nakadawat sa mga ambulansya nga walay local counterpart nga nagkantidad og 40% sa gasto. Ang matag ambulansya mokantidad og mga usa ka milyon ka pesos ug sa patakaran sa
PCSO, ang benepisyaryo moabaga gayud sa 40% niini. (PIA-Bohol/ecb)
by boholbalita | Apr 23, 2010 | Election 2010, Headlines, Local News / Bohol Balita
Nagpaabot si presidential candidate Senator Manny Villar sa Nacionalista Party sa desisyon ni Gob. Erico Aumentado aron motapo iyang grupo sa di ma moabot ang adlaw sa piniliay karong Mayo 2010.
Kini maoy gipadayag ni Villar dihang gipangutana sa mga sakop sa media didto sa Bohol Tropics atol sa iyang pagduaw sa lalawigan sa Bohol niadtong Miyerkulis.
Matud ni Villar, nga iyang suod nga higala si Aumentado dihang siya pa ang speaker sa balay balauran atol sa administrasyon ni kanhi presidente Joseph Estrada ug abli pirmi ang iyang pultahan kun mopadayag na kini nga molukso sa iyang partido.
Apan gibutyag ni Villar nga kasagaran sa mga mayor nga niluhar kaniya pulos mga kaalyado sa gobernador hinungdan nga dili gayud kalikayan nga magduda ang mga katawhan nga siya gayud ang gisuportahan niini. “Basahin mo ang mga mayor, di ba mga supporter sila (Aumentado)”, asoy pa ni Villar.
Si Aumentado kinsa sakop sa administrasyong Lakas-Kampi-CMD nidagan isip kongregista sa ikaduhang distrito sa Bohol diin siya nitukod sa iyang grupo nga Lakas-Aumentado Wing human sa ilang panagbangi sa gubernatorial candidate, Kongresista Edgar Chatto ug Kongresista Ondoy Cajes.
Niining bag-o nitukod na usab ang ang grupo ni Aumentado ug Herrera ug Grand Alliance nga gikalungkaban sa mga ubang partido sama sa Liberal Nationalist People’s Coalition aron kontrahan ang tinguha ni Chatto sa pagka-gobernador.
Ang gobernador gihimong guest candidate nila bise gobernador Herrera ug manlalaban Tomas Abapo kinsa magpapili isip gobernador ug bise gobernador sa umaabot nga eleksyon. (Andy Nalzaro)
