by ace | Oct 5, 2011 | Announcements, National News
TAGBILARAN CITY, Oct. 04–Manghatag og ayuda ang Pag-IBIG, Government Service Insurance System (GSIS) ug Social Security System (SSS) sa ilang mga miyembro nga grabeng naapektuhan sa milabay nga duha ka bagyo. Kinatibuk-ang 80 porsiyento sa kontribusyon ang mahimong i-calamity loan sa matag miyembro nga pagabayaran sulod sa duha ka tuig. Gawas sa calamity loan, mahimo usab makakuha og multi-purpose loan diin 80 porsiyento usab sa kontribusyon ang mahimong mahulam.
Modawat usab ang GSIS og aplikasyon alang sa emergency ug calamity loan nga P20,000 matag miyembro nga adunay 6 percent nga interes sulod sa tulo ka tuig ug mahimo usab mag policy ug salary loan ang matag miyembro sa GSIS. Walay calamity loan ang SSS, apan mahimong mag-salary loan nga mokabat ngadto sa P24,000. Kun ang usa ka miyembro nagub-an og balay, nagtanyag usab ang ahensiya og house repair o improvement loan nga mokabat ngadto sa P300,000. (PIA-Bohol/ecb)
by Misael | May 20, 2008 | Headlines
GIKOMPIRMAR ni Office of the President Undersecretary Jose Cepedocia nga usa sa mga hisgutan sa Cabinet Meeting nga pangunahan ni Presidente Gloria Macapagal Arroyo sa usa ka resort dinhi sa Bohol karong adlawa mao ang paghusay sa Manila Electric Company (MERALCO) ug sa Government Service Insurance System (GSIS).
Kagahapon atul sa press briefing didto sa GPG Hall sa Kapitolyo, si Cepedocia mibutyag nga usa sa mga agenda sa Cabinet Meeting sa pagbisita sa bahan sa Presidente dinhi sa Bohol mao ang nasangpit nga hisgutanan.
Dugang ni Cepedocia, mismo si GSIS Winston Garcia ug mga tinugyanan sa MERALCO mahidangat atul sa tigum uban sa Presidente.
Mahidangat si Presidente Gloria Macapagal Arroyo ug ang iyang Kabinete sa Bohol karon aron sa paglubong sa time capsule isip pormal nga sinugdanan sa P4.2 bilyones nga airport nga tukuron sa Panglao.
Ang proyekto sa Panglao Bohol International Airport gamitan sa P3B nga corporate funds sa Manila International Airport Authority (MIAA) ug tugbangan usab sa mga pundo sa Department of Transportation and Communication (DOTC), dugang ni Tirso Serrano sa MIAA gahapon.
Human sa unang engagement sa Presidente, modiretso siya sa Panglao Island Nature Resort sa Bingag Dauis, isla sa Panglao aron pangunahan ang Cabinet Meeting nga gitakda didto. (rachiu/PIA)
