“High value commercial crops” Mopasaka sa kita sa mag-uuma
KON buot nato nga kapun-an ang kita sa mag-uuma, ang high value commercial crops angay maoy tan-awon sa mga tinugyanan.
Ang pasabot gikan mismo sa baba sa kanhi kalihim sa Agrikultura, Arthur Yap, kinsa namulong atol sa pagbukas sa Agri-tekno Fair sa nataran sa Provincial Agriculture Office.
Kon ang usa ka ektarya nga humay mo-ani lamag 60 ka kaban ug mahali’g P50 mil, ang letsugas o lettuce mohatag sa mag-uuma’g P400 mil sa matag ektarya, butyag ni Yap, kinsa mao nay representante sa tersero distrito sa Bohol.
Bisan sa watermelon lamang, matud niya mo-hatag og P300 mil matag ektarya, ug kini may posibleng maayong pilianan sa mga mag-uuma, kinsa, dugang ni Yap, angay makapahimulos sa pagtaas sa turismo dinhi.
Kapin kon kulang 600 mil ka turista ang mosuroy sa Bohol matag tuig, ug daghan niini, dili na gani kaayo mokaon og kan-on, mao nga sumpay ni Yap, mahimong imintinar na lamang ang 113 ka porysentong rice sufficiency sa Bohol ug ugmaron ang High Value commercial crops.
May mga teknolohiyang mahimong kasawhan sa mga interesadong mag-uuma didto sa Buhatan sa Provincial Agriculture, panapos niya. (PIABohol)
