Pagpananum sa mais hulip sa humay, gihungusgan sa DA
SA padayong kanihit sa bugas humay, ang pagpatanum ug mais aron ikahulip sa panginahanglan sa pagkaon ug dugang kita sa mga mag-uuma maoy gitutukan sa Department of Agriculture (DA) karon.
Kini samtang namatikdan nga duna nay maayo nga marketability sa mais, kong itandi sa kamatis ug patatas nga kanhi maoy gipatanum.
Mokabat na sa P11.50 ngadto sa P12 ang matag kilo sa mais, kompara sa P7 ang kilo nga palit kaniadto.
Sa pagpalapad sa programa alang sa yellow corn, misanggi ang nasud sa dugang 2 milyones ka metriko toneladas nga mais sa milabay nga unang 3 ka buwan.
Kini butyag ni Agriculture Undersecretary for Field Operations Dennis Araullo, kinsa mao usay coordinator sa National Corn Program (NCP).
Dugang niya, napalapad ngadto sa 5.36% ang maisan sa nasud ug kadaghanan niini gitamnan sa hybrid nga yellow corn.
Sa padayong pagpalapad sa programa, laing P325 M ang gikinanhanglan sa NCP alang sa 75 mil hektaryas nga yuta nga tikaron alang sa maisan.
Kon magsubra ang produksyon, ang mais karon mao na unyay ibaligya sa gawas alang sa bio-fuel. Nahibaloan nga ang usa ka tonelada nga mais maghatag ug 380 ka litros nga bioethanol
Hinuon, miangkon ang DA nga suliran pa gihapon ang pagpangita sa linsok alang sa puti nga mais nga maoy gigaling aron ihulip sa humay isip staple sa mga taga Visayas ug Mindanao. (rachiu/PIA)
