Drayber sa kotse nga nibangga sa motorsiklo didto sa Loay nailhan na
Nailhan na sa kapulisan ang drayber sa usa ka Mitsubishi Lancer nga nibangga sa usa ka motorsiklo nga dunay sakay nga tulo ka mga batan-on sa nasudnong dalan sa Barangay Alegria Sur, Loay, Bohol niadtong Sabado sa kaadlawon.
Si Inspector Ricardo Tero, hepe sa Loay Police Station niila sa suspetsado si Lyn Taguro, hamtong nga panuigon, usa ka dalaga ug nagpuyo sa Graham Avenue, dakbayan sa Tagbilaran.
Mautd ni Tero nga ang abogado sa maong suspek nga si Manlalaban Hermilo Butron niduaw sa ilang buhatan aron pag bayad sa piyansa sa iyang kliyente apan wala kini nahimo kay wala pa mapasaka ang sumbong didto sa piskalya.
Sa laing bahin, gibutyag ni Tero nga usa sa mga biktima nga nailhan nga si Mark John Detallan, 17- anyos, ulitawo, taga Barangay Tinago, Dauis, Bohol giputlan sa wala niining paa sud sa Gov. Celestino Gallares Hospital human naka angkon kini ug bali atol sa maong aksidente. Niingon si Tero nga nabilin pa ang ubang unod sa biktima sa kotse nga may plaka numero GCT-860 atol sa ilang pagrikober sa maong sakyanan didto sa compound Palo Beach Resort sa samang lungsod. Laing mga biktima nga sila si Dexter John Guirigay, 22-anyos ug John Emil Guirigay, 30-anyos, nagpuyo gihapon sa barangay Tinago nadala usab sa samang tambalanan.
