2 ka motorsiklo nagsungag sa Loboc, 1 ang patay, 2 ang grabeng naangol
PATAY ang usa ka drayber sa motorsiklo samtang laing duha ang grabeng naangol human nagsungag ang duha ka motorsiklo didto sa nasudnong dalan sa barangay Bagumbayan, Loboc, Bohol niadtong Sabado sa alas 10:30 sa buntag.
Ang biktima nailhan nga si Angelito Bebero, 25, ulitawo kinsa giingong kolektor sa usa ka kompaniya sa lending ug taga-barangay Bayacabac, Maribojoc.
Nakaangkon ang biktima og grabeng angol sa iyang lawas ug sa ulo ug nabugtuan sa iyang kinabuhi pasado alas 5 sa hapon nianang adlawa didto sa Gov. Celestino Gallares Memorial Regional Hospital sa dakbayan sa Tagbilaran.
Samtang ang naangol nailhan nga sila si Ricardo Leopoldo, 49, minyo, drayber sa motorsiklo ug ang iyang backrider nga iyang asawa nga si Olimpia Leopoldo, 57, minyo, nagpuyo sa barangay Lagtangan, Sevilla, Bohol. Gidala ang maong magtiayon sa samang tambalanan.
Sa pakisusi sa kapulisan nga samtang ang magtiayong Leopoldo nagsakay sa usa ka Suzuki TS 100 nga motorsiklo kolor pula nga walay plaka ug walay rehistro nagdagan paingon sa Poblacion Loboc dihang pag-abot sa maong dapit, kalit lamang nibangga ang naghaguros nga Honda Wave 125 kolor itom nga dunay buak nga plaka 7-A 8248 ug gimanehoan ni Bebero kinsa nagdagan sa lahi nga direksiyon.
Matud sa taho nga pulos nangatuwad ang duha ka mga sakyanan ug nangalagpot ang mga sakay niini pipila ka metros sa nahitaboan.
Dugang sa taho nga pulos walay helmet nga gisul-ob ang naasoy nga mga biktima atol sa insidente. (Andy Nalzaro)
