2 testigo sa PNP chopper deal, gibutang na sa WPP

by | Aug 12, 2011 | Headlines, National News

TAGBILARAN CITY, Aug. 11 (PIA) – GIBUTANG na sa Senado sa Witness Protection Program (WPP) sa kagamhanan ang duha ka negosyanteng nitudlo kang kanhi First Gentleman Mike Arroyo nga maoy utok sa pagbaligya sa segunda-manong helikopter sa Philippine National Police (PNP) sa presyong brand new.

Gi-aprubahan ni Senate President Juan Ponce Enrile ang pagbutang sa WPP nilang Lionair President Archibald Po ug Manila Aerospace Products Trading Corp. (MAPTRA) President Hilario de Vera.

Sa iyang pagbalik og atubang sa pagdungog sa Senate Blue Ribbon Committee, gitumbok ni Po nga wala siya bisan kanus-a man nalambigit sa bisan-unsang maanomalyang transaksyon sa PNP nga giingong gipasulod ni De Vera

Gitataw pa ni Po nga aduna siya’y gigunitan nga mga dokumento nga magpamatuod nga si Mike Arroyo ang tinuod nga nanag-iya sa lima ka chopper.

Gi-prisintar pa sa General Manager sa Lion Air nga si Rene Sia ang usa ka wire transfer certificate gikan sa Lourdes T. Arroyo (LTA) Incorporated nga gipanag-iya ni Arroyo, alang sa $500, 000 deposit alang sa pagpalit sa lima ka Robinson chopper niadtong tuig 2003.

Gahapon, gipasakaan ni Arroyo si Po og kasong perjury, false testimony ug offering a false testimony tungod sa maong alegasyon. (PIA-Bohol/ecb)

Wala pag-agi ni Mike Arroyo sa Immigration, gipaimbestigar sa DOJ

by | Aug 6, 2011 | Headlines, Local News / Bohol Balita

TAGBILARAN CITY, Aug. 5 (PIA)–Gipaimbestigar na ni Justice Secretary Leila de Lima kang Bureau of Immigration (BI) Commissioner Ricardo David ang wala pag-agi ni kanhi First Gentleman Mike Arroyo sa Immigration sa dihang milakaw kini paingon sa Hong Kong niadtong Domingo, Hulyo 31.  Matud pa ni De Lima, nakadawat siya og report nga adunay nilihok sa mga dokumento ni Arroyo.

Base sa flight manifest, migawas sa nasud si Arroyo sakay sa Cathay Pacific.

Gibutang na sa Immigration watchlist ang kanhi First Gentleman nga nipahibalo usab nga mopaule siya sa Lunes human sa iyang medical check-up apan giingong mag-depende sa iyang mga doktor kun motambong siya sa imbestigasyon sa Senado.

Ipatambong sa Senate Blue Ribbon Committee si Arroyo sa imbestigasyon niini sa pagpalit sa duha ka segunda-manong helikopter sa Philippine National Police (PNP) sa presyong brand new. (PIA-Bohol/ecb)