AFP dili mounda’g lutos sa mga rebeldeng MILF-Yano
DILI moundang ang Armadong Kusog sa Nasud (AFP) paghimog agresibong aksyon batok sa mga rebeldeng Moro Islamic Liberation Front (MILF) kinsa nanghasi sa mga lugar sa Lanao ug North Cotabato.
Matud ni Gen. Alexander Yano, dili rason ang giingon sa MILF Central leadership nga wala silay control sa pagpanghasi sa mga sakop sa 104th ug 105th Base Commanders ubos nila ni Commander Bravo ug Umbra Kato.
Sukad pa niadtong Agosto 1 nga gisulod sa mga rebeldeng MILF ubos ni Kumander Umbra Kato ang 15 ka barangays sa North Cotabato ug tungod sa padayong hisgutay sa kalinaw, wala kini pakganga sa mga sakop sa AFP, butyag ni Yano.
Gisugdan sa kagamhanan ang opensiba human sa 24 oras nga ultimatum sa pagpahawa sa mga rebelde niadtong Agosto 9 ug nailog pagbalik ang 15 ka barangay human sa tulo ka adlaw nga operasyon militar.
Niadtong Lunes, laing mga sakop sa rebeldeng MILF ubos ni Kumander Bravo ang mi-sulod sa Colambugan, nanghasi sa Iligan City ug laing tulo ka lungsod sa Lanao.
Hinuon, miatras ang mga rebelde apan nagbilin ug 23 ka sibilyan ug usa ka opisyal sa sundalo nga nga patay. (rachiu/PIA)
