by boholbalita | Sep 14, 2010 | Headlines, Local News / Bohol Balita
PATAY ang usa ka drayber sa motorsiklo samtang laing duha ang grabeng naangol human nagsungag ang duha ka motorsiklo didto sa nasudnong dalan sa barangay Bagumbayan, Loboc, Bohol niadtong Sabado sa alas 10:30 sa buntag.
Ang biktima nailhan nga si Angelito Bebero, 25, ulitawo kinsa giingong kolektor sa usa ka kompaniya sa lending ug taga-barangay Bayacabac, Maribojoc.
Nakaangkon ang biktima og grabeng angol sa iyang lawas ug sa ulo ug nabugtuan sa iyang kinabuhi pasado alas 5 sa hapon nianang adlawa didto sa Gov. Celestino Gallares Memorial Regional Hospital sa dakbayan sa Tagbilaran.
Samtang ang naangol nailhan nga sila si Ricardo Leopoldo, 49, minyo, drayber sa motorsiklo ug ang iyang backrider nga iyang asawa nga si Olimpia Leopoldo, 57, minyo, nagpuyo sa barangay Lagtangan, Sevilla, Bohol. Gidala ang maong magtiayon sa samang tambalanan.
Sa pakisusi sa kapulisan nga samtang ang magtiayong Leopoldo nagsakay sa usa ka Suzuki TS 100 nga motorsiklo kolor pula nga walay plaka ug walay rehistro nagdagan paingon sa Poblacion Loboc dihang pag-abot sa maong dapit, kalit lamang nibangga ang naghaguros nga Honda Wave 125 kolor itom nga dunay buak nga plaka 7-A 8248 ug gimanehoan ni Bebero kinsa nagdagan sa lahi nga direksiyon.
Matud sa taho nga pulos nangatuwad ang duha ka mga sakyanan ug nangalagpot ang mga sakay niini pipila ka metros sa nahitaboan.
Dugang sa taho nga pulos walay helmet nga gisul-ob ang naasoy nga mga biktima atol sa insidente. (Andy Nalzaro)
by boholbalita | May 21, 2010 | Local News / Bohol Balita
Namatay ang usa ka drayber sa motorsiklo samtang grabeng naangol ang iyang backrider human aksidenteng nibangga ang ilang gisakyang motorsiklo sa usa ka van for hire didto sa national highway sa barangay Upper dela Paz, Cortes, Bohol niadtong nakalabay nga gabii.
Biktima nailhan nga si Gerald Rempis, hamtong ang panuigon kinsa gikatahong lumad sa kaulohan ug temporaryong nagpuyo sa Capitol Site, Dakbayan sa Tagbilaran.
Nakaangkon ang biktima ug grabeng samad sa ulo ug ubang parte sa kalawasan ug namatay human nadangat sa Gov. Celestino Gallares Memorial Hospital sa siyudad.
Samtang ang kauban sa biktima nailhan lamang nga usa ka Tata kinsa lumad sa dakbayan sa Sugbo gidala usab sa samang tambalanan ug anaa sa malisud nga kahimtang.
Nasayran sa taho nga samtang ang mga biktima sakay sa usa ka asul nga Yamaha STX nga motorsiklo na may plaka IJ 5310 nga gimanehuan ni Rempis nagdagan sa nasudnong dalan alas 7 sa gabii sa Dominggo dihang pag-abot sa nahisgutang dapit, ni overtake kini ug osa ka multicab ug nibangga sa usa ka GT Express Van for Hire Adian Topic Van nga may plaka GWM 873 nga gimanehuan ni Reynaldo Chavez, 49, taga – Lag-itan, Doljo, Panglao, Bohol.
Gumikan sa kakusog sa bangga, nangalagpot ug nabunal ang mga ulo sa biktima sa maong sakyanan ug nalabay sa kalsada.
Nahibaw-an sa mga imbestigador sa Cortes Police Station nga lango sa alak ang duha ka biktima ug walay gisul-ob nga crash helmet atol sa naasoy nga insidente. (Andy Nalzaro)
by magnolia_eic | Apr 28, 2010 | Local News / Bohol Balita
Tubigon — Patay ang usa ka mag tiayon, ang asawa buntis, human ang motorsiklo nga ilang gisakyan aksidenteng nibangga sa usa ka de pasaheroang bus nga naka-parking sa karsada didto sa barangay Ilijan Norte, Tubigon, Bohol niadtong Dominggo sa gabii. Ang mga biktima nailhan nga sila Ryan Jumamil, 28 anyos, minyo ug ang buntis niyang asawa nga si Feliza Jumamil, 26-anyos, nagpuyo sa barangay Calunasan, Calape, Bohol. Naka angkon ang duha ug grabeng samad sa ulo ug ubang bahion sa ilang lawas ug gidiklarang patay na sa dihang nadangat sa Tubigon Community Hospital.
Nasayran sa taho nga samtang ang isa ka Titi Transport Bus nga may body number 258 ug plaka numero GVL-419 nga gipanag-iyahan ni Jesus Veloso, taga Catagbacan Sur, Loon, Bohol ug gimanehoan ni Tito Corbeta, 57-anyos, minyo ug nagpuyo sa samang dapit gikan sa Tubigon ug samtang nagparking ang maong sakyanan sa tuong bahin sa kalsada mga 6:35 sa gabii aron mo-drop ug pasahero, kalit na mibangga ang usa ka Honda XRM kolor itom nga motorsiklo nga dunay plaka MC6493KH ug gimanehuan ni Jumamil didto sa sampot sa bus.
Matus sa taho nga gumikan sa kakusog sa bangga, napasok ang motorsiklo sa ilalom sa maong bus ug nangalagpot ang magtiayon didto sa karsada.
Sigun sa taho nga si Jumamil walay lisensya sa pagmaneho ug waala nagsul-ob ug crash helmet sama sa iyang asawa.
Naguba ang motorsiklo sa biktima samtang ang driver sa natumbok nga bus gikustodiya na sa Tubigon Police Station. (Andy Nalzaro)
