Faeldon andam mo atubang sa mutiny, mga kasong rebilyon
NAGTUO nga makab-ot ang hustisya ubos sa bag-ong administrasyon, si Marine Captain Nicanor Faeldon ni ingon nga andam siyang mo atubang sa mutiny ug mga kasong rebilyon nga gipasaka batok niya.
Sa usa ka press conference sa Antipolo City diin gi presenta si Faeldon, nagkanayon kini nga ni surrender siya sa mga otoridad tungod kay nagtuo siya nga makab-ot dili lamang niya, apan apil usab sa iyang mga kauban nga nag-atubang usab sa susamang mga kaso, ang hustisya ubos sa administrasyon ni President Benigno Simeon “Noynoy” Aquino III.
Si Faeldon nagtuo nga ang bag-ong administrasyon dili manghilabot sa atong justice system.
Matud pa sa tigpamaba sa Armed Forces nga si Brig. Gen. Jose Mabanta nga anaa na sa administrasyong Aquino kon hatagan ba og amnesty si Faeldon ug ang ubang mga sundalo nga ni surrender usab ngadto sa militar.
Si Faeldon ni surrender ngadto sa Marine Corps niadtong Hulyo 6, 2010 ug ni atubang sa mga tigbalita atol sa press conference sa Antipolo City human sa duha ka adlaw.
Nag atubang si Faeldon og mga kaso sa civilian ug military courts tungod sa giingong partisipasyon niini sa duha ka higayon nga pagsulay sa pagpukan sa administrasyon ni kanhi President Gloria Macapagal-Arroyo. (PIA-Bohol)
