by magnolia_eic | Jul 27, 2011 | Headlines, National News
TAGBILARAN CITY, Bohol, July 26 (PIA) – GITUDLO ni Presidente Benigno “Noynoy” Aquino III si kanhi Supreme Court Justice Conchita Carpio-Morales isip bag-ong Ombudsman. Gi-anunsyo kini sa Presidente sa iyang State of the Nation Address (SONA) gahapon.
Matud pa sa Presidente nga nagtuo siyang aduna nay tanod-bayan ang kagamhanan nga wala’y gidapigan. Naglaum usab ang Presidente nga sa pagkatudlo kang Morales, mapasakaan na og kaso ang tanang nagkasinabot sa pagpangurakot.
Sa iyang bahin, giseguro ni Morales nga wala siya’y planong puntiryahon si kanhi presidente ug karon Pampanga Congresswoman Gloria Macapagal-Arroyo aron lamang makabalos.
Matud pa sa bag-ong Ombudsman nga himuon niyang patas ug mosunod gayud siya sa due process sa pagpasaka og kaso. Si Morales ang mihulip sa niluwat sa pangatungdanan nga si kanhi Ombudsman Merceditas Gutierrez. (PIA-Bohol/ecb)
by magnolia_eic | Jul 6, 2011 | Headlines, National News
TAGBILARAN CITY, Bohol, July 5 (PIA)–Gimando sa Office of the Ombudsman ang pag- imbestiga kang kanhi presidente ug karon Pampanga Congresswoman Gloria Macapagal-Arroyo sa isyu kalabot sa P728 milyong fertilizer fund scam.
Sa gipagawas nga kamanduan ni acting Ombudsman Orlando Casimiro nga gibasa sa tigpamaba sa Ombudsman nga si Atty. Mary Rawnsle Lopez, gi-aprubahan ni Casimiro an pagtukod og fact-finding team aron mag-imbestiga kang Arroyo base na usab sa reklamo nga gisang-at ni kanhi Solicitor General Attorney Frank Chavez ug sa grupong Kilusang Magbubukid ng Pilipinas (KMP).
Samtang gibasura usab ni Casimiro ang nauna nang rekomendasyon nga ma-dismiss ang maong kaso batok kang Arroyo tungod sa kakulang og lig-on nga ebidensya. Pasabot sa Ombudsman, tataw nga ang secretary mao ang alter ego sa presidente nga adunay direktang kontrol ug nagduma sa mga cabinet secretary.
Tuyo sa maong kamanduan sa Ombudsman nga mahibaw-an kun unsa man ang tulobagon ni Arroyo sa paggasto sa fertilizer fund ug diin kini padung. Gawas kang Arroyo, kauban usab nga pa-imbestigahan sa Ombudsman si kanhi Agriculture Undersecretary Jocelyn ‘Joc-joc’ Bolante.
Posible usab nga ipatawag sa gitukod nga fact-finding team sa Ombudsman si Arroyo. (PIA Bohol/ecb)
