by magnolia_eic | Jul 14, 2011 | Headlines, National News
TAGBILARAN CITY, Bohol, July 14 (PIA)–PAABOTON una ni Presidente Benigno “Noynoy” Aquino III ang resulta sa imbestigasyon sa Senado sa giingong anomalya sa paggamit sa pondo sa Philippine Charity Sweepstakes Office (PCSO) sa dili pa mopatuman og reporma. Giseguro sa Presidente nga magpatuman og reporma sa pagpagawas og pondo sa ahensya pinaagi sa mga problemang madiskubre sa Senado.
Giingong nagsugod ang problema sa PCSO nga naglambigit sa mga obispo sa Simbahang Katolika human madiskubri sa report sa Commission on Audit (COA) nga nakakuha og pondo ug sakyanan ang ubang Obispo ug ang laing pondo usab gigamit isip blood money
sa mga Overseas Filipino Workers (OFW) nga adunay kaso sa ubang nasud nga adunay pagtugot sa miaging administrasyon.
Sigun pa sa Presidente nga may gi-andam nang reporma aron hugtan ug matarong ang pagpagawas og pondo sa PCSO aron malikayan nga mapahimoslan kini. (PIA-Bohol/ecb)
by magnolia_eic | Jul 6, 2011 | Headlines, National News
TAGBILARAN CITY, Bohol, July 5 (PIA)–Migawas sa mga dokumento gikan sa Philippine Charity Sweepstakes Office (PCSO) nga sila si Kongresista Erico Aumentado ug Talibon Mayor Roberto Cajes milampos sa pagpagawas sa mga ambulansya alang sa ilang mga dapit isip mga gipaboran nga kaalyado sa administrasyon ni kanhi Presidente Gloria Macapagal Arroyo.
Ang maong taho napatik sa mga nasudnong pamantalaan nga mihingan ni Aumentado nga apil sa 65 ka mga gobernador nga Pro-Arroyo nga nakakuha sa labing daghang ambulansya atol sa katapusang upat ka tuig sa administrasyong Arroyo. Si Aumentado nakadawat sa 12 ka ambulansya isip gobernador sa Bohol diin ang lalawigan mipas-an sa 40% nga kantidad sa ambulansya. Samtang si Cajes nga naapil sa 29 ka mga Kongresista nga gipaboran sa mga tawo ni Arroyo nakadawat og usa ka ambulansya alang sa iyang distrito sa Bohol.
Ang tanang 29 ka mga Kongresista ug pipila ka mga gobernador, gawas ni Aumentado gikataho nga nakadawat sa mga ambulansya nga walay local counterpart nga nagkantidad og 40% sa gasto. Ang matag ambulansya mokantidad og mga usa ka milyon ka pesos ug sa patakaran sa
PCSO, ang benepisyaryo moabaga gayud sa 40% niini. (PIA-Bohol/ecb)
