Phivolcs mangapud-apud og mga intensity meters sa tibuok nasud

by | Feb 14, 2012 | Headlines, Local News / Bohol Balita, National News

TAGBILARAN CITY, Bohol, Feb. 13 (PIA)–Sugdan sa Philippine Institute of Volcanology and Seismology (Phivolcs) ang pagpangapud-apud sa kapin sa 100 ka intensity meters sa tibuok nasud aron mapadali ang pagtubag sa lokal nga kagamhanan kun adunay moigo nga linog.

Sa usa ka radio interview, gibutyag ni Phivolcs Director Renato Solidum nga ang intensity meter usa ka matang sa instrumento nga simplified version sa mga seismograph nga makahatag og impormasyon kun unsa kakusog ang mahitabong paglihok sa ibabaw sa yuta.

Matud pa, mahinungdanon ang pagbaton sa intensity meter tungod kay pinaagi niini, masayran dayon sa mga responder ug local government units (LGU) kun unsaon nila pagresponde sa linog nga moigo sa ilang lugar.

Unahon paghatag sa mga intensity meter ang mga lokal nga kagamhanan sa Metro Manila ug mga duol nga probinsya diin adunay nay 40 ka units niini.

Ang maong intensity meter adunay screen diin morehistro dayon ang intensity nga miigo sa usa ka lugar. Nakakunektar usab kini sa computer sa Phivolcs ug mogawas dayon sa mapa nila diin makita dayon sa LGU, responder ug sa media.

Target sa Phivolcs nga masugdan karong tuiga ang pagpangapud-apud sa mga intensity meters pinaagi sa proyekto sa JICA- Science and Technology Department. (PIA-Bohol/ecb)

Mt. Bulusan nibuga na usab og abo

by | Nov 24, 2010 | Headlines, National News

NIBUGA sa usad og abo ang bulkang Bulusan sa probinsiya sa Sorsogon nga niabot sa duha ka kilometro ang pinakataas sulod sa duha ka semana.

Matud pa sa Philippine Institute of Volcanology and Seismology (Phivolcs), alas 7:22 Lunes sa buntag sa dihang nipagawas og abo ang bulkan.

Bisan nagpakita og senyales sa pagka-aktibo ang bulkan, wala paman daw angay ikaalarma ang mga katawhan didto tungod kay wala pa gihapon sila’y nakit-ang senyales sa kusog nga pagboto niini.

Pero matud pa sa Phivolcs, posibleng masundan pa ang maong pagboto mao nga gisugdan na sa lokal nga kagamhanan ang pagbakwit sa mga 500 ka pamilya sa ubang barangay sa lungsod sa Irosin nga naapektuhan sa ash fall.

Partikular nga gipaubos sa voluntary evacuation ang mga residente sa mga barangay Gulos ug Cogon nga sakop sa 6km extended danger zone. Temporaryo silang gipahimutang sa evacuation center sa ilang tunghaan sa Brgy. Irosin

Nagpadayon pa ang evacuation sa lungsod sa Ubany sa Brgy. Puting Sapa gamit ang military truck nga prayoridad ang mga bata. Gisugdan na usab ang pagpanghatag og relief goods sa mga evacuees. (PIA)