Gov. Edgar Chatto pormal nang nanumpa isip bag-ong RPOC-7 Chair atubangan ni PNoy
TAGBILARAN CITY, Aug. 2 (PIA)–PORMAL nang nanumpa sa katungdanan si Gobernador Edgar M. Chatto atubangan ni Presidente Benigno Simeon Aquino III isip bag-ong Chairman sa Regional Peace and Order Council 7 (RPOC-7). Mao kini ang labing unang pagduaw sa lalawigan sa Bohol sa Presidente human kini midaug sa pagkapangulo sa nasud sa milabay nga piniliay.
Ang pagpanumpa sa katungdanan ni Gov. Chatto gihimo ganinang buntag didto sa Bohol Tropics Resort atubangan sa mga pundok sa mga magbabalod sa probinsiya, mga mayores, ug mga nagkalain-laing hugpong sa mga Bol-anon. Human sa gihimo nga paghurar sa pangatungdanan sa mosunod nga RPOC-7 Chair, gihimo dayon ni outgoing RPOC-7 Chairman Gov. Gwendolyn Garcia, ang gobernador sa Sugbo, ang pagtugyan sa katungdanan ngadto ni Chatto.
Gilauman sa mga sakop sa RPOC-7 nga ang pagduma ni Gov. Chatto makatampo og daku alang sa gipangandoy nga kalinaw sa rehiyon syete uban sa mga lalawigan sa Bohol, Cebu, Negros Oriental ug Siquijor. (PIA-Bohol/ecb)
