by magnolia_eic | Jul 27, 2011 | Headlines, National News
TAGBILARAN CITY, Bohol, July 26 (PIA) – GITUDLO ni Presidente Benigno “Noynoy” Aquino III si kanhi Supreme Court Justice Conchita Carpio-Morales isip bag-ong Ombudsman. Gi-anunsyo kini sa Presidente sa iyang State of the Nation Address (SONA) gahapon.
Matud pa sa Presidente nga nagtuo siyang aduna nay tanod-bayan ang kagamhanan nga wala’y gidapigan. Naglaum usab ang Presidente nga sa pagkatudlo kang Morales, mapasakaan na og kaso ang tanang nagkasinabot sa pagpangurakot.
Sa iyang bahin, giseguro ni Morales nga wala siya’y planong puntiryahon si kanhi presidente ug karon Pampanga Congresswoman Gloria Macapagal-Arroyo aron lamang makabalos.
Matud pa sa bag-ong Ombudsman nga himuon niyang patas ug mosunod gayud siya sa due process sa pagpasaka og kaso. Si Morales ang mihulip sa niluwat sa pangatungdanan nga si kanhi Ombudsman Merceditas Gutierrez. (PIA-Bohol/ecb)
by magnolia_eic | Jun 28, 2011 | Headlines, National News
GISUGDAN na sa Kamara ang pagpangandam sa ikaduhang State of the Nation Address(SONA) ni Presidente Benigno “Noynoy” Aquino III sa Hulyo 25 ning tuiga. Bisan usa ka buwan pa sa dili pa ang ikaduhang SONA sa Presidente, dungan sa pagbukas sa second regular session sa 15th Congress, gisugdan na kagahapon ang sayo nga pagpangandam sa technical working group sa Kamara.
Sa maong panagpulong, gihatagan ang mga mamamahayag og nagka-daiyang lugar nga ilang pundohanan sa maong programa.
Giingong katuyoan niini nga dili na mahitabo og balik ang pipila ka kagubot niadtong unang SONA ni Presidente Aquino, diin gikan sa parking area, gallery ug lobby, wala nasunod ang ilang plano tungod sa kadaghan sa mga nitambong ug naghuot sa mga lugar nga giisip nga restricted areas.
Natino nga gikan sa angay lamang 2,000 nga gidaghanon sa bisita, niabot kini sa kapindoble, diin ang uban gihatagan na lamang og dugang lingkuranan aron ma-accommodate sa venue. (PIA-Bohol/ecb)
