SRNH palapdan, pantalan sa Ubay, Getafe sukip na
HUMAN sa pagbukas sa duha pa pantalan alang sa RoRo sa Bohol, gilaraw na usab sa kagamhanan nga palapdan pa ang Strong Republic Nautical Highway (SRNH).
Butyag ni Transportation Undersecretary Maria Elena Bautista, pagkap-os sa pagsulay sa Central Nautical Highway, buot ni Presidente Gloria Macapagal-Arroyo nga ang iyang kabiling proyekto sumpayan pa gayud sa lain pang agianan: kadtong motadlas ug magsumpay sa duha ka dagkong nautical highways gikan sa kasubangan ngadto na sa kasadpan.
Ang proyekto nga maglakip sa mga dalan, tulay ug mga pantalan nga magsumpay sa Eastern Nautical Highway ngadto sa Western Nautical Highway nagsukip na usab sa mga pantalan sa Getafe ug Ubay sa Bohol.
Dugang ni Bautista, gitumbok na sa kagamhanan ang 15 ka mga proyektong RoRo nga nagkinahanglan ug pag-ugmad, pag-upgrade o pag-ayo, ug kini sugdan gilayon hangtud sa pagtapos sa termino sa Presidente.
Kauban sa mga pantalan sa Bohol ang Caticlan sa Aklan, Dumangas sa Iloilo, San Antonio sa Sorsogon, Esperanza sa Masbate, Daanbantayan sa Cebu, Naval sa Biliran, Toledo sa Cebu, Tabuelan sa Cebu, Bogo sa Cebu, Balud sa Masbate, Taytay sa Palawan, Ajuy sa Iloilo, ug Punta Engaño sa Cebu.
Sa laing bahin, gidugang ni Bautista sa pag-ingon nga ilang ipadeklara nga mga nasudnong dalan ang kadtong masakop sa SRNH. .
Kon matuman, ang nasudnong kahamhanan na maoy mopundo alang sa pagpatukod, pagmintinar ug sa pagpadgan ning mga nahisgutang dalan ug nautical highway. (rachiu/PIA)
