Quarry sa LGU sa Candijay gireklamo
Gireklamo ang usa ka quarrying operations nga gihimo sa Barangay Pagahat, sakop sa lungsod sa Candijay di pa lang dugay ug giandam na matud ang complaint nga ipasaka sa Department of Environment and Natural Resources (DENR) tungod sa padayong pag kutkot sa bato didto.
Ang tinubdan sa BBDN nitaho nga ang gihimong quarrying operations posibleng makadaot sa public infrastructure apil na niini ang poste sa NAPOCOR diin naglatay and tinubdan sa kuryente ug ang gikutkutan anaa pa gyud duol sa tunghaang elementarya sa Pagahat-Ang, Pagahat Elementary School.
Ang nakaparat, matud pa, nga ang LGU mismo sa Candijay ang naghimo sa maong quarrying operations aron itambak ang mga nakuhang bato ngadto sa karsada nga gipang ayo sulod sa lungsod ug gigamitan pa sa mga heavy equipment.
Gikabalaka sa mga residente didto nga ang nagpadayong pagkotkot sa mga bato makahimong kadaut sa ilang kalikopan ug posibleng makahatag ug disgrasya sa mga kabtangan ug kinabuhi sa mga tawo nga naduol sa lugar kon ugaling moabot ang dakong uwan nga mu resulta unya sa landslide.
Matod pa sa tinubdan, nga adunay ordinansa sa probinsya nga nagdili sa mga quarrying operations kon kini himoon, 500 metros ang gilay-on gikan sa mga public infrastructure. Apan ang gihimong pagpangotkot anaa ra gayud sa nataran sa eskwelahan sa elementarya sa Pagahat ug anaa sa tiilan mismo sa poste sa NAPOCOR.
Gawas sa gi andam na letter of complaint, gihangyo usab sa mga residente ang Provincial government nga ila untang aksyonan kining nagpadayon nga operation bisan pa man kon ang LGU mismo maoy naghimo sa maong operation.
