Kanhi QC police chief maoy bag-ong NBI director
SI kanhi police director Magtanggol Gatdula ang gitudlo nga bag-ong pangulo sa National Bureau of Investigation kon NBI.
Gipahayag kini ni Executive Secretary Paquito Ochoa Jr. atol sa salo-salo uban sa Malacañang Press Corps niadtong Huwebes sa gabii.
Si Gatdula ni retiro gikan sa police force niadtong Hunyo 3 human nahimong pangulo sa Directorate for Information, Communications, and Technology Management sa Philippine National Police kon PNP.
Una niini, nahimo siyang Quezon City police chief gikan tuig 2006 hangtud 2009.
Ni alagad siya og 37 ka tuig sa militar ug sa police human natapos gikan sa Philippine Military Academy niadtong tuig 1976 kauban ni PNP Director-General Jesus Verzosa.
Usa ka abogado si Gatdula. Nakapasar siya sa bar examinations niadtong tuig 1984 human sa pagtuon sa abogasya sa University of the East. Nakahuman usab siya sa masters degree in Public Administration ug usa ka doctorate sa Peace and Security Administration.
Gradwado usab si Gatdula gikan sa Federal Bureau of Investigation National Academy sa Quantico, Virginia. Nikuha usab siya og ubang kurso sa law enforcement sa mga nasud sa United States, Australia, Thailand, Germany, Japan, United Kingdom ug Singapore. (PIA-Bohol)
