by boholbalita | Apr 23, 2010 | Headlines, Local News / Bohol Balita
Duha ka gidudahang tigpahuyot sa ilegal nga drogang shabu ang nadakpan sa gihimong ronda sa bahan sa Special Weapons and Tactics (SWAT) sa Bohol Provincial Police office didto sa C.P.G. North Avenue, duol sa Coca Cola Plant dakabayan sa Tagbilaran kagahapon sa udto.
Ang mga nadakpan nailhan nga sila si Gabriel Lopez, nagpuyo sa Capitol Valley, Barangay Dao ning siyudad ug Raul Mabao, taga Upper dela Paz Cortes, Bohol, pulos hingkod ang pangedaron ug pulos minyo.
Nasayran sa taho nga ang ginsakpan sa SWAT ubos sa kamanduan ni Chief Inspector Nicomedes Olaivar nipahigayon ug usa ka search warrant nga gipagula ni Maghukom Fernando Fuentes III sa Regional Trial Court Branch 49 nga nakabase sa siyudad batok sa mga suspek didto sa ilang buhatan sa Santi Ventures Inc.
Nasakmit sa maong buhatan mao ang usa ka medium size sachet nga gidudahang dunay shabu, lima ka sachet nga gituhuang may shabu residue lakip na ang mga shabu paraphernalia, tulo ka Nokia cellphone ug salaping mokabat ngadto sa P2,000. Gipaslak sa detention cell didto sa Kampo Dagohoy ang duha ka suspek. (Andy Nalzaro)
by boholbalita | Apr 16, 2010 | Local News / Bohol Balita
Duha ka gikatahapang tigpahuyot sa ilegal na drugang shabu, usa niini nakasohan sa maong sala, nadakpan sa gihimong ronda sa kapulisan sa managlahing balay didto sa barangay Cnapnapan, Corella, Bohol kagahapon sa buntag.
Ang mga suspetsado nailhan nga sila RAymond Ingking ug Jose Meleriano Alingig.
Nabawi gikan sa panimalay ni Ingking ang usa ka sachet nga gidudahang adunay shabu, laing sachet nga gidudahang naay shabu residue lakip na ang mga shabu paraphernalia.
Samtang nasakmit sa pinuy-an ni alingig ang duha ka sachet nga gidudahang dunay shabu ug mga shabu paraphernalia.
Sigun sa taho nga ang bahan sa Special Weapons and Tactics kun SWAT, Provincial Public Safety Management Company ug Special Operations Group kun SOG sa Bohol Provincial Police Office ubos sa pagpangulo ni Chief Inspector Nicomedes Olaivar nironda sa mga pinuy-an sa duha basi sa kuha sa search warrant nga gipagula ni Hukom Fernando Fuentes III sa Regional Trial Court Branch 49 nga nakabase sa dakbayan sa Tagbilaran tungod sa paglapas sa Akta Republika 9165.
Sayo niini, si Ingking aduna nay kaso nga giatubang sa hukmanan human kini nadakpan sa samang sala apan nakagawas kay nakapiyansa.
Gidala ang duha ka suspek didto sa Kampo Dagohoy ug gipaslak sa bilangguan. (Andy Nalzaro)
