Mga piskal sa Oakwood mutiny dismayado
WALA nakauyon ang mga piskal sa Department of Justice (DOJ) nga maoy nagdala sa kaso sa Oakwood mutiny nga hatagan og amnestiya si Senador Antonio Trillanes.
Niingon si Senior State Prosecutor Juan Pedro Navera nga nadismaya sila sa desisyon sa Malakanyang nga hatagan og amnestiya ang tanang myembro sa Magdalo nga nahilambigit sa Oakwood mutiny tungod kay nahulog lamang sa wala ang pito ka tuig nga ilang gi trabaho sa maong kaso.
Matud pa nga ang timing sa amnesty proclamation ang problema tungod kay a-desisyunan na sa Makati Regional Trial Court (RTC) ang kaso batok nilang Trillanes karong Oktubre 28.
Mas maayo daw unta nga gihulat una ang korte nga i-promulgate ang kaso aron mahibaw-an kung sad-an ba o dili si Trillanes.
Nabalaka ang mga piskal nga maghatag hinuon kini og pagpangatarungan sa ubang sundalo nga mobatok sa kagamhanan tungod kay pasayluon raman sila sa kasamtangang administrasyon.
Ang amnestiya usa ka prerogative sa Presidente apan kinahanglan pa nga uyonan kini sa Kongreso.
Ang maong proklamasyon nga gilagdaan ni P-Noy niadtong Lunes i-sumite sa Kongreso aron botohan sa mga magbabalaod. (PIA-Bohol)
