14th National Crime Prevention Week mo-sentro sa kalihukan sa mga kabatan-unan batok sa krimen
Sa pagsa-ulog sa ika-14 nga National Crime Prevention Week karong Setyembre 1-7, gi-awhag nga ang mga kabatan-unan nga mo-apil sa mga kalihukan aron ma-sumpo ang krimen.
Sa usa ka direktiba ni Ronald Puno, Kalihim sa DILG, gi-awhag ang mga probinsyal, lungsod ug lokal nga konseho sa kalinaw nga mohimo ug mga programa para mabulokon ang maong kasa-ulogan, ug aron malikayan ang krimen sa ilang mga dapit.
Ang maong kalihukan, moha-um sa tema nga “Kapit-Bisig Kabataan Tungo sa Kapayapaan, Now Na!” ug ang slogan nga “Lakad Kabataan Laban sa Kriminalidad,” aron mo-sentro ug mohatag ug kahigayunan sa mga kabataan sa paghilambigit sa mga programa sa pagsumpo sa krimen sa ilang dapit.
Usa sa mga kalihukan mao ang pagtugod ug pagpalig-on sa Student Crime Prevention Network, dugang ni Puno.
Ang usa ka semanang kasa-ulogan pinasakad sa Presidential Proclamation No. 461 nga mi-deklara sa unang semana sa Setyembre matag tuig isip National Crime Prevention Week. (PIA/Bohol)
